Mawkyrwat, Lber 11
Ka kynhun ïalehkai jong ka KMC Sonapur FC ka la pynliem noh da 2-1 kol ïa ka Shillong Lajong FC ha ka jingïalehkai Semi Final wat ba nyngkong (first leg) jong ka lympung ïalehkai Mawlangwir Football Invitation Tournament 2023-24 kaba la long ha ka 9 tarik mynta u bnai ha Rowell Lyngdoh Stadium kaba ha Saitsnad, Mawlangwir, South West Khasi Hills.
Haba phai sha katei ka jingïalehkai ha ryngkat ka jingsakhi da ki hajar ngut ki paidbah, ka jinglehkai ka la long shisha kaba itynnad bad ïakhaid bha. Ha ka kylla step naduh ba sdang ka jinglehkai, ka KMC Sonapur ka la lah ban ïalehkai bha ban ïoh shibun ki kabu ban thep kol, hynrei da ka jingskhem ki rangïalehkai ‘dien jong ka Lajong kam shym lah ïoh lad ban pynkhih jar.
Hadien shiteng kynta ka Shillong Lajong ka la ïoh pynkhih jar nyngkong eh lyngba ka penalty ha ka minit kaba 38.
Ha ka kylla miet ka jingïalehkai ka la nang itynnad shuh shuh bad ka KMC Sonapur ka la ñoin tyngeh ban pynphai ïa ka kol hynrei ka shym la lah ban pynurlong. Ym tang kata, hynrei ka la pynlehnoh ei ruh ïa ka penalty lyngba ka jingtbit jong u rangap kol ka Shillong Lajong uba la ïoh ban kem suk ïa ka bol.
Dei ha ka minit kaba 81 ba ka KMC Sonapur ka la lah ban pynïakhaid kol lyngba u Shubham Chetri. Da ka jinglah ban ïalehkai bha shuh shuh ka la ïoh ban thep sa shi kol ha ka minit kaba 90+3 lyngba u Shabham Chetri bad pynlong ïa ka KMC ba tam da 2-1 ïa ka Shillong Lajong.
Ïa ka nam Man of the Match la khur da u Shubham Chetri jong ka KMC Sonapur uba la ïoh ban thep ar tylli ki kol.
Wat la ka Shillong Lajong ka la shah rem ha ka wat kaba nyngkong, hynrei ka dang don ka lad ha kaba kan hap ban ïakhun tyngeh ha ka wat ba ar pyrshah ïa ka KMC Sonapur.
Na ka liang ka Mawlangwir SC ka la pyntip ruh ba ka jingïalehkai (2nd Leg) kaba bud kan long hapdeng ka Niaw Wasa FC pyrshah ïa ka Golden Lion FC ha ka 13 tarik.
