Shillong, Lber 11
Kawei ka longkmie na Lower Lumparing, Shillong, ka la duh ei ïa ka pisa kaba jan kot sha ka T. 1 lak ha ki briew kiba la pynsheptieng ïa ka ba ki dei na ka tnat tohkit Central Bureau of Investigation (CBI) hadien ba ki la pynngeit ba ka la don ka jingleh bakla na ka liang jong ka ha kaba ïadei bad ki kam pisa pilaiñ.
Katkum ka khubor ba la ïohlum na ki pulit ha ka Lah Sngi U Blei, la ong ba ha ka 8 tarik Lber ha ka por kumba 9 baje mynstep, kata ka longkmie ka bym shym la pynpaw kyrteng, ka la ïoh ïa ka ‘phone call’ na u nombor ba kam tip ha kaba kata kaba ‘phone’ ka la kam ba ka dei na ka tnat Telecom.
Ha kata ka jingïakren la ong ba lyngba uwei u nombor ‘phone’ Mobile ba don ha ka kyrteng jong ka, la pynmih ïa ki byrta ki shula kiba long be-aiñ bad kiba phah ïa ki jingthoh kiba pyndik ïa kiwei ha sor Mumbai.
Na ka liang katei ka longkmie, hadien ba ka la sngap ïa kata ka jingkren, ka la kyrpad ïa katei ka nongkren ba kan khang noh ïa uta u nombor bad ka la ong ruh ba kam shym la pyndonkam satia ïa uta u nombor. Hynrei, kata ka nongkren ka la ong ba kan pynïakren ïa katei ka longkmie bad ka tnat Cyber Crime ha Mumbai khnang ban pynthikna.
Haba la ïakren bad ka tnat Cyber Crime, uta uba ïakren bad katei ka longkmie u la pynithuh ïalade kum u Sagar Ram. Ha kata ka jingïakren, la ong ba uta u Sagar u la tohkit ïa ka bad u la pyntip sha ka ba ka don ka ‘Bank Account’ jong ka ha Canara Bank kaba don bynta ha ka jingpyndonkam bakla ïa ka pisa bad namarkata, ka CBI ka la pynmih da ka hukum ban kem ïa katei ka longkmie.
Nalorkata, u Sagar u la bthah ïa katei ka longkmie ba kan wan mih hakhmat jong ki pulit ka Mumbai hapoh ar kynta ha katei ka sngi, kata, ka 8 tarik Lber, bad lada kam lah ban leh kumta, yn khang noh ïa ka ‘Bank Account’ jong ka ha Canara Bank na ka bynta hynriew bnai.
Hynrei katei ka longkmie ka la pynpaw ba kam lah satia ban wan mih hakhmat ki pulit ka Mumbai namar ka don ha Shillong. Tangba na ka liang u Sagar Ram u la tyrwa ban ïarap ïa ka bad u la kyntu ïa ka ba kan phah ïa ka pisa kaba haduh T. 1 lak lyngba ka ‘GPay’ sha ka M/s Birendra Enterprises. Katei ka longkmie ruh ka la kohnguh, hynrei kata ka pisa ka khlem leit satia.
Hadien ba ka pisa ka khlem leit, u Sagar Ram u la kyntu ïa ka ba kan phah ïa ka pisa ha ki ar bynta, kata, T. 90,000 bad T. 5,000, bad katei ka longkmie ruh ka la kohnguh bad ka la leh kumba la bthah. Dei tad hadien katto-katne por ba katei ka longkmie kan sa sngewthuh ba ka la shah shukor ha kitei ki briew.
