Shillong, Lber 11
U Myntri Rangbah ka jylla, u Conrad K Sangma, ha 11 tarik Lber u la buh mawnongrim ban tei ïa ka New Shillong Water Supply Scheme lem bad ar tylli kiwei pat ki projek ba kynthup ïa ka Land Reclamation Project ha ka Waste Processing and Disposal Site ha Marten Mawlai bad ka jingtei ïa ka surok hapoh ka New Shillong Township ha Mawkhanu, Mawpdang.
Ha kane ka sngi buh mawnongrim ha ka jingïalang kaba la pynlong ha Mawkhanu, Mawpdang la ïadon lang u Symbud Myntri Rangbah ka jylla Bah Sniawbhalang Dhar, u Myntri ka tnat PHE u Marcuise Marak, ka Myntri ka koit ka khiah ka Kong Ampareen Lyngdoh, u Chief Secretary ka jylla Bah DP Wahlang lem bad kiwei kiwei ki ophisar.
U Myntri Rangbah haba ai jingkren u la ong, ka New Shillong Water Supply Project, kaba kot T. 1600 klur ka dei kawei na kiba heh tam ka projek kaba ka sorkar ka la bhah tyngka.
“Ka New Shillong Water Supply Scheme ka dei kawei na ki projek kaba heh ka ban pyntreikam ha ka khana pateng jong ka jylla. La mang ïa katei ka projek haduh T. 1600 klur ha kaba la dep ruh ban pyllait T. 500 klur na ka bynta ka wat kaba nyngkong bad la buhthong ban pyndep ïa ka projek hapoh ki 36 bnai,” la ong u Conrad.
Ka New Shillong Water Supply Scheme kan pynbiang um na ka bynta ka Nongbah Shillong bad New Shillong Township kynthup ïa ki jaka pule, shlem treikam bad 32 tylli ki shnong kiba don kumba 29,889 ngut. Kane ka jingthmu ka dei ruh da kaba buh jingmut lypa ban pynbiang um ïa ki 198,997 ngut ki briew ha u snem 2042 bad 413,701 ngut ki paidbah ha u snem 2057.
Ha kaba ïadei bad ka jingshna ïa ki surok shnong ha New Shillong Township, u Myntri Rangbah u la ong ba la shna ïa ki surok ha Mawkhanu ha ka jinglut kaba 185 klur tyngka.
U la pyntip ruh ïa ka jingshna ïa kiwei kiwei ki surok hapoh ka New Shillong Township ban pynsuk ïa ka leit ka wan, kiba kot 343 klur tyngka bad kine ki kynthup ïa ka surok na Ummir sha Mawkhanu bad Kynton sha Lyngkien, Bellefonte sha New Township, Diengpasoh Road sha Shillong Bypass bad na Bribah Mawpat sha New Township.
Ha ka wat ka Ba-ar jong ki surok, ka surok ba 16.6 Km ba heh 15 Meter bad ka surok 2 lane ba 3.2 Km ba heh 7.5 M la tyrwa ha ka jinglut jingsep kaba T. 185 klur tyngka. Ïa kitei ki surok la khmih lynti ban pyndep hapoh u snem 2026.
Ha kaba ïadei bad ka Land Reclamation Project ha ka Waste Processing and Disposal Site ha Marten, Mawlai, u Myntri Rangbah u la ong, “Ki jaboh kiba la don ha katei ka jaka kam dei tang ka jingsngewkhia ki nongshong shnong ka thaiñ hynrei ka dei ïa ki paidbah ha ka jylla baroh kawei. Ngin pynkylla ïa kitei ki ñiut sha ki mar ïa kaba yn lah ban pyndonkam biang”.
U la ong, ba ïa katei ka projek yn pyndep hapoh ka 12 haduh 18 bnai. “Ïa ka jaka lum ñiut yn sa pynkylla sha ka jaka kaba ki paidbah kin lah ban pyndonkam bad kane kan long ruh kum ka “Model” ne nuksa kaba lah ban leh ha kiwei pat ki jaka jong ka jylla,” u la ong.
U la ong ruh ba ka sorkar kala buh ïa ka “Roadmap” ban kyntiew shuh shuh ïa ka roi ka par jong ka jylla ban wanrah ïa ka jingkylla ha ki paidbah.
“Ka sorkar MDA ka trei da ka jingïohi jngai kaba shai kdar bad ka Roadmap ban kyntiew shajrong ïa ka jylla, hapoh jong ki 10, 25 bad wat 50 snem,” u la ban jur.
“Ha ki 4 snem ban wan, kan long ka por kaba kongsan na ka bynta ka jylla bad ki paidbah. Ka New Shillong Township kaba kynthup ïa ka “Knowledge City and the Administrative City” la dep ban bhah pisa `10000 klur tyngka lyngba ka Mang Tyngka na ka bynta ban kyntiew ïa ka roi ka par, kaban plie lad ban aikam aijam ha ki kam kiba thymmai ka ban kot 50,000 tylli,” la ong u Myntri Rangbah.
U la pyntip ruh ïa ka jingbuh thong ka sorkar pdeng ban tei ïa 8 tylli ki New Townships ha kylleng ka ri, u Myntri Rangbah u la ong ba ha ka New Shillong Township, Meghalaya ka don hapoh ka jingkhmih bniah jong ka Sorkar India ha kaba yn ïohpdiang ïa ka Additional Grant kaba T. 500 klur.
U la pyntip shuh shuh ba baroh kitei ki jingthmu jong ka sorkar ki dei kiba ïadei lang bad ki jingthmu bad ka jingïohi jngai jong ka jylla ban pynurlong ïa ka thong jong ka ïoh ka kot kaba 10 Billion US Dollar bad ban kyntiew ïa ka kamai kajih jong ki paidbah.
