Shillong, Lber 11
Ki pulit ka East Khasi Hills District ha ka janmiet 11 tarik u Lber 2024 ki la ïalam tian bishar biang ïa u dkhot jong ka Hynñiewtrep National Liberation Council (HNLC), u Bah Storgy Lyngdoh uba dei ruh u Personal Security Officer (PSO) jong u Vice Chairman barim ka HNLC bad uba la khot sin kum u Bah Manbhalang Jyrwa uba la ïadon bynta ha ka jingïakren ïasuk bad ka sorkar ha u snem ba la dep.
Katei ka jingrah ïa u Bah Storgy Lyngdoh sha ïingkashari ban tian bishar ka dei hadien ba la kut ka jingpan por kaba 10 sngi na ka ïingkashari hadien ba la u don hapoh ka jingtohkit jong ki pulit lane ka Police Custody.
Na ka liang ka ïingkashari bad Session Judge East Khasi Hills District ha ka 11 tarik u Lber 2024 ka la ai jingbit ban tohkit da ka Judicial Custody kaba 14 sngi ïa u Bah Storgy.
U Bah Storgy Lyngdoh u la shah kem noh napoh ka ïingsah lade kaba don ha Mawlynrei, Khliehshnong ha ka 2 tarik u Lber 2024 hadien katto-katne sngi ba u la wanphai napoh Bangladesh.
Katkum ka jingtohkit jong ki pulit la ong ba u Bah Storgy u la phah shithi dawa pisa na ka bynta ka seng HNLC kaba la ïalam sha ka jingpyntieng pynsmiej ïa kiba bun ki nongkhaïi kiba don hapoh Shillong.
U Bah Storgy u la shah pynngat ruh ha ka jingdonkti ban ïadonbynta bad katei ka kynhun seng kaikhlaw, ka jingpynkheiñ aiñ da kaba leh ïa ki kam be-aiñ bad ki kam lehnoh, ka jinglum pisa bad ka jingïasuh buit bad katei ka seng kaikhlaw ban leh ïa kino-kino ki kam be-aiñ.
Katkum ka jingong jong ki pulit, ki la ong ruh ba u Bah Storgy u dang dei u dkhot uba treikam bha jong ka HNLC bad u dei ruh uba ïajan bha bad u Deputy Commander in Chief jong ka HNLC.
U Bah Storgy u la shah pynngat hapoh kiba bun ki aiñ bad ki kyndon jong ka IPC kiba kynthup hapoh ka 120B, 506 bad 507, 384 bad 511.
