Shillong, Lber 11
Shi bynta ban pynlong ïa ki khynnah ki samla ba kin lait na ki jingsniew ba bun jait, ka Sorkar Jylla ka la pynkhreh ban tei noh da ka madan ïalehkai Futsal ha madan Madan Shnong kaba ha Lower Mawprem, Shillong.
Kane la wan hadien ba na ka liang u Myntri Rangbah u Conrad K. Sangma ha ka Sngi Thohdieng jong ka taïew ba la dep u la buh maw nongrim ha kaba la ïadon lang u Myntri ka tnat ïalehkai u Bah Shakliar Warjri lem bad u Myntri ka tnat jngohkai bad uba long ruh u MLa ka thaiñ u Bah Paul Lyngdoh.
Kane ka jingbuh maw nongrim ka long ruh shwa ka ilekshon MP Lok Sabha.
“Kane ka long ka jingshim khia da ka Sorkar jylla na ka bynta ki samla ba kin pynleit jingmut ha ki kam ïalehkai. Te kumta ha kine ki khyndiat snem ba la lah ngi la mang haduh ` 700 klur na ka bynta ban tei ia ki jaka ïalehkai bapher bapher bad palat 300 tylli ki jaka ïalehkai ki la ïai bteng ban urlong bad 122 tylli la lah ban pyndep ïa ki projek ha kine ki lai snem,” la pynpaw u Myntri Rangbah da kaba pynpaw ba haduh 20 tylli ki madan ïalehkai Futsal kin sa mih ha ka Jylla hi baroh kawei.
Shuh shuh u la ong ba ka Sorkar Jylla ka thrang ban plie lad ïa ki samla jong ka Jylla lyngba ki prokram bapher bapher kum ka Skills Meghalaya, YESS Meghalaya, PRIME, CM Elevate bad kiwei kiwei.
U la ïathuh ruh ba ka jingtei ïa ka Mawkhanu Sports Complex ka long haduh T. 350 klur bad kane ka long shi bynta ban kyntiew ïa ki kam ïalehkai. “Lyngba ka jinglah ban pyndep ïa ka Mawkhanu Sports Complex, ngi lah ban pynlong ïa kino kino ki lympung ïalehkai kiba heh ha ka Jylla,” u la bynrap.
U la ong ruh ba ka STAR Program Talent Scouting kan dangïai bteng ha ka ban ai jinghikai na ka bynta ki nongïalehkai ki ban ïoh shim bynta ha ka 6th Meghalaya Games ka ban sa long ha bad ruh ha ka National Games ka ban long ha ka lawei ka ban wan.
