Mawkyrwat, Lber 11
Ka jingkieng kaba don ha Umshangkar Larem hajan ka shnong Nongsynrih ha South West Khasi Hills District ka la hap jraiñ bad dkut thui bad kawei ka trok kit nar rot kaba dang thmu ban jam na shiliang sha shiliang ruh ka la hap lang.
Kane ka la jia ha ka por mynstep jong ka 11 tarik mynta u bnai kaba la pynkyndit thret ïa u paidbah nongïaid nongïeng. Katei ka jingkieng ka dei kaba pynïasoh ïa ka Mawkyrwat, Parïong bad Nongshillong.
Katkum ki tyllong khubor ba la ïohlum la ïathuh ba katei ka la jia ha ka por kumba 9 baje eie mynstep ha kaba kawei ka trok kit nar rot kaba don ïa u registration number AS01-EC-8291 kaba la mih na Nongkasen ban leit sha Rangblang bad ynda ka la poi ha katei ka jingkieng ban ïaid sha shiliang kyndit-kynsan katei ka jingkieng ka la dkut bad ka trok ka la hap lang bad sahkut hapdeng ka jingkieng.
Shuh shuh ki tyllong khubor ki la ïathuh ruh ba ha katei ka jingjia kam shym la don kano-kano ka jingmynsaw. Ka daw kaba pynlong ban dkut katei ka jingkieng haduh mynta ym shym la lah ban tip bad la suba ka dei namar ba ka la sator bad ka jingïaid jong ki trok kiba kit palat pud kaba la pynlong ïa katei ka jingkieng ban dkut noh.
