Gaza, Lber:
U heh nongialam ka kynhun lehnoh Hamas, u Ismail Haniyeh ha ka Sngi U Blei u la ong ba katei ka kynhun lehnoh jong ka Palestine ka long ba la kloi ban pdiang ia ka jingiakren bad ka Israel ha kano- kano ka por. Kane ka khubor ka long hadien ba ka jingiakren sangeh thma naka bynta ka jinglehniam Ramadan ka la pulom bad ka Israel kam shym la sangeh tdot ia ka thma kumba la kyntu bad kyrpad da ki ri bapher jong ka pyrthei namar ka Israel ka pynksan ba lada kan sangeh ia ka thma ha kane ka por, ki lehnoh Hamas kin iohlad ban ïatylli bad kin nang ioh bor biang bad kumta ka Israel kam kwah ban ailad hynrei kan iakhun ban pynkut noh syndon ia ka thma bad ba kan ioh kheit noh shen ia u soh ka jingjop kumba ka la smai naduh kaba sdang jong ka jingleit kput jongka pyrshah ia kitei ki lehnoh Palestine kiba la leit thombor nyngkong eh ia ka Israel ha ka 7 tarik u Risaw jong u snem ba la leit.
Namar na ka liang jong utei u heh nongialam ka Hamas, u la ong ba ka jingbym seisoh jong ki jingiakren ïasuk ka long namar ka jingleit hiar thma ba khlem sangeh jong ka Israel sha Gaza bad ka bym shym la ailad shuh wat tang ban pyndep ia ki kam- ki jam kiba kongsan bad kiwei kiwei ruh ki ri naduh ka jingpynpoi bad jingpdiang ia ki jingiarap ba kiwei ki ri ki thmu ban pynpoi sha ki paid nongshong shnong ka Palestine hapoh Gaza.
Kumta, la ong ba kiba bun ki ri bad ki tnat bapher jong ka pyrthei ki la ialeh ban pynsangeh shipor ia ka jingleit hiar thma jong ka Israel sha Gaza khnang ba kin ioh ban leit pynpoi ia ki lad jingiarap ba kongsan sha ki paidbah nongshong shnong ka Gaza, kiba la shong shah thngan bad shong tyrkhong naduh ba la neh ka thma mynta da ki bnai.
Ha kajuh ruh ka por utei u heh ka Hamas haba iakren bad kitei ki lad pathai khubor ha ka Sngi U Blei hapoh Qatar, u la ong ba ka daw ba ka Israel kam treh ban sangeh thma, ka long namar ba kam kwah ban pyllait ia ki nong Palestine kiba ka la kem bad set baroh shi katta ki bnai bad ki snem ba la leit.
Ha ka jingshisha u la ong ba ka Hamas ka la kwah ban sangeh noh syndon ia katei ka thma namar la iohi ia ka jingduh ei ia ki mynsiem briew ba lui-lui hapoh Gaza naduh ba ka Israel ka la leit ban pynhiar kput ia ka jingleit thombor jong ka Hamas sha Israel ha une u snem ba la leit. Katba ka Israel pat kam shym pdiang ia ki jingiakren ïasuk bad kam treh ban pynkut noh ia ka thma da lei-lei ruh namar ka kwah ban ioh kurup bad synshar hi noh da ki shipai jongka ia ka nongbah Gaza jong ka Palestine.
Namar la ong ba wat hadien ba ki ri bapher ki la kyntu ia ka Israel ba kan phah mih noh ia ki shipai jongka na Gaza, hynrei u Myntri Rangbahduh ka Israel- u Benjamin Netanyahu u la kyntait ban phah mih ia ki shipai ka Israel napoh Gaza bad kumba u la smai naduh kaba sdang jong ka thma ba ka Israel kan pynhiar kput ia ka jingleh jong kitei ki lehnoh naduh kaba sdang bad kumta ruh u la ong ba ka Israel ka la rai ban pyndep ia kaba la kular bad smai baroh bad kan pynduh jait syndon ia katei ka kynhun lehnoh Hamas kaba synshar hi ia ka nongbah Gaza jong ka Palestine mynta la katto katne snem.
Katba, ka Israel ha ka Sngi Saitjaiñ ka la kynnoh kylla ba ka Hamas ka pynpaw ba kam shym don mon ban sangeh ia katei ka thma tang shipor bad ba kam kwah ruh ban pyn jaijai ia ka thma wat hapdeng ka jingleh niam ‘Ramadan’ jong ki jaitbynriew Muslim ha kane ka por.
