Shillong, Lber 11
Ka Lumpyngngad SCC ka la long ka lahduh ha ka lympung ïalehkai First Division Shillong Cricket League ba la pynïaid da ka Shillong Cricket Association. Kane ka wan urlong hadien ba ka la lah ban pynliem noh ïa ka Donkin SC da 61 run ha ka Lah Sngi U Blei.
Kane ka nam jop ka la wan urlong ruh lyngba u Vishal Kr Balmiki uba la ïohpdiang ruh ïa ka nam Player of the Match lem bad u Raja Kr Balmiki na ka bynta ban pynlong ïa ka Lumpyngngad ban buh ïa ka thong da 219 run bad shah pynhap 8 wiket ha ki 40 over.
Ha kane ka jingïakhun final, u Vishal u la lah ban tied 66 run na ki 82 bol bad u Raja u la ïoh 40 run na ki 37 bol. Katba u Marcus Bhujel u la shim 2 wiket bad 1 wiket da u Rohit Rai na ka bynta ka Donkin.
Haba wan beh ïa ka thong ba la buh da ka liang pyrshah, ka Donkin ka la kamai 158 run hadien ba ka la shah pynhap 10 wiket ha ki 33.1 over. U Baremdor LS Lyting u la tied 24 run na ki 29 bol bad u Rayner Lyngdoh u la ïoh 24 run na ki 56 bol. Katba u Vishal Kumar Balmiki bad u Parveen Katty ki la shim mar 2 wiket na ka bynta ka Lumpyngngad.
Lah ban pynkynmaw ka Lumpyngad bad ka Donkin ki la kiew kyrdan sha ka Super Division ha kaba kin ïoh ban ïashim bynta naduh u snem ban wan.
