Shillong, Lber 11
U Superintendent of Police (SP) ka East Khasi Hills district, u Rituraj Ravi u la ïathuh ba dei halor ka jinglap sabut kaba biang la kem ïa ki ar ngut ha ka miet Sngi U Blei haba ïadei bad ka jingjia bthei bom IED ha Them Metor kaba la jia ha ka miet 9 tarik u Lber. Nangta, u la ong ba ka jingkem kam dei namarba ki don bad kano-kano ka seng ne kynhun hynrei ka jingkem ka dei beit halor ki sabut.
Kine kiba la shahkem ki kynthup uwei na Dawki bad uwei pat na Malki, Shillong. Hadien ba la ïalam ïa ki sha Ïingkashari ha ka Lah Sngi U Blei, ka Ïingkashari ka la hukum ban set 10 sngi ha along ki pulit ha kaba ki pulit kin ïoh ruh ban tohkit kham bniah ïa kine ar ngut.
Haba kylli ba kine kiba shahkem ki dei ki dkhot ka Hynñiewtrep National Youth Front (HNYF), u SP u la ong ba ka jingkem ïa ki kam dei halor ka nongrim ba ki don jingïadei bad kano-kano ka kynhun ne ka seng, hynrei ka jingkem ka dei halor ka jinglap ïa ki sabut ba ki donkti ha ka jingjia. Namarkata, u la ong ba ym don jingïadei ka jingdonbynta jong ki bad kano-kano ka seng ne kynhun, hynrei la kem ïa ki namar ka jingïadei bad ka jingjia ha ka jingbthei bom.
Haba maham tyngeh, u SP u la ong ba ki pulit ki dang ïaid shakhmat ban tohkit bad ki trei da ka jingkut jingmut kaba skhem ban ïoh kem haba ïadei bad kane ka jingjia bad yn sa kem beit ïa baroh kito kiba donkti ha kum kane ka jingïasylla kaba triem kaba thmu ban wanrah ka jingbym shong shngaiñ. U la ong ba baroh kiba leh kin ngat ha ki kyndon jong ka aiñ bad ïoh ïa ka jingbishar ba hok.
Shuh shuh haba kylli halor ka jingpynkhlaiñ ïa ki bor pahara khamtam ha ki jaka ha nongbah Shillong namar kum kine ki jingbthei ki la jia teng kham mynshwa, u SP u la ong ba ka bynta kaba nyngkong ka dei jingtohkit kaba bniah halor kane ka jingbthei IED ha Them Metro ha kaba la thaw ïa ka kynhun kaba peit ïa ka jingtohkit na kiba bun ki liang bad pynlong ruh ïa ka jingtohkit kaba bniah bad ha ka rukom kaba don ka jingshemphang. U la ong ba ka ba-ar pat ka dei ka jingkham pynkhlaiñ ïa ki bor pahara ha baroh ki jaka kiba kham kyrpang bad lah ban kham don jingma bad kino-kino ki jaka kiba kham long syier ka jingshngaiñ la kham pynkut ïa ki nongpahara. U la ong ba ka bynta kaba lai ka dei ka jingpyrkhat lypa ïa ki lad ki lynti na ka bynta ka jingshngaiñ ha ki por ban sa wan lyngba ka jingpeitngor ban tip bad lap ïa kiba donkti ban saiñdur ïa kum kine ki kam pyntriem bad haba ïadei bad kane, ki pulit dang leh ïa kaba donkam ban leh.
Haba ïadei bad ki jingjia bthei bom ha ki por ba la leit ha kaba ka HNLC ka ju kam ba ka leh ma ka, u SP u la ong ba ha ki jingjia kiba jia mynshwa, ka HNLC ka ju wan shakhmat ban kam ba ka pynbthei bom ma ka, hynrei ha kane ka jingjia kaba mynta ym don kano-kano kaba kum kata.
Hynrei u la ong ba haba tohkit bad khmih ïa ka rukom long ka jingbthei IED kaba mynta, ka syrïem bad kito ki jingbthei bom kiba la jia kham hashwa bad dei halor kane, ba ka jingtohkit ka hap ïaid na baroh ki liang.
Kumta une u SP ka East Khasi Hills district u la ong ba kum u khlieh jong ka district u kren na ka bynta ka district ba kino-kino kiba thmu ban pynthut ïa ka suk ka saiñ ki pulit kim shah bad ailad satia.
