Shillong, Lber 11
Ka Khasi Hills Autonomous District Council (KHADC) ka la wanrah ïa ka mang tyngka bapura jong u snem 2024-2025, hynrei ha kane ka mang tyngka, khlem pyni bad batai shai satia ïa ka mang tyngka haba ïadei bad ki jingmih na ki tnat bapher bapher jong ka Council bad ka mang tyngka na ka bynta ki jingpynlut kiba ïadei bad ka Council.
Ïa kane ka mang tyngka la wanrah da u Chief Executive Member (CEM) ka KHADC u Bah Pynïaid Sing Syiem lyngba ka jingkren jong u halor ka mang tyngka ha sngi ba sdang ka Dorbar Mang Tyngka jong ka Council ha ka Lah Sngi U Blei.
Ha kane mang tyngka, u CEM u khlem pyni bad batai bniah satia ïa ka mang tyngka haba ïadei bad ki jingpynmih pisa bad kumjuh ruh ka mang tyngka haba ïadei bad ki jingpynlut pisa jong ka Council na ka bynta u snem 2024-2025.
Ha ka jingshisha ki don katto-katne ki tnat kiba pynmih pisa lyngba ki khajna kum ka Professional Tax, ka Tax na ki kali bad ka jingïohlum na ki mar poh khyndew nalor kiwei ki jingmih na ki ïew. Ki don ruh ki jingpynlut pisa na ka bynta ki tnat treikam bapher bapher ka KHADC kumjuh ruh ka jingsiew tulop ïa ki nongtrei jong ka Council.
Ha ka jingkren jong u, u CEM u la pynshai ba ha kane ka mang tyngka 2024-2025, ym shym la pyni ïa ki jingpynlut (expenditures) bad ki jingmih (receipts) jong u snem 2023-2024 namar bym pat ïoh lum lut ïa ki jingkheiñ bad yn sa pyni pat ha ka mang tyngka jong u snem 2025-2026.
U CEM u la ong ba haba ïadei bad ka nongrim jong ka jingmang tyngka jong ki tnat bapher bapher ka long katkum ki mat ba hap ban pyntreikam hadien ba la puson bha halor ka ïoh ka kot bad kumjuh ruh ha kaba ïadei bad ka jingmang jingpynlut ha kaba pynïaid ïa ka shalyntem ka jingtreikam.
Ha kane ka mang tyngka, na ka liang u CEM u la shu ïathuh kyllum ïa ka mang tyngka na ka bynta ki jingpynlut kaba long `329 klur, 07 lak, 710 tyngka katba ka jingmang kyllum haba ïadei bad ki jingpynmih pisa ka long `329 klur, 02 lak, 67 hajar 300 tyngka.
Kane ka mang tyngka jong ka KHADC na ka bynta u snem 2024-2025 ka pyni ba ka duna pisa da `4,33,410 namar ka jingmang kyllum ïa ki jingpynlut ka kham heh ban ïa ka jingmang kyllum ïa ki jingpynmih pisa.
