Shillong, Lber 11
U Chief Executive Member ka Khasi Hills Autonomous District Council (KHADC) u Bah Pynïaid Sing Syiem u la kren skhem ba ka Council kan nym ailad ban khlong ïa u mar poh khyndew Uranium.
“Kumba la ong naduh mynshwa haba ïadei bad u Uranium, ka KHADC kam ai kano-kano ka jingbit sha kano-kano ka kynhun la ka dei lyngba ka Sorkar Jylla ne Sorkar Pdeng ba kin tih ïa u Uranium. Ngi ïeng ha ka nongrim ban nym ai NOC da lei-lei ruh em. Kane ka long ka khubor sha kino-kino ki kynhun ba ngin nym ailad ban tih ïa u uranium,” la ong u Bah Pynïaid.
U Bah Pynïaid u la ong ba ka Council kan sa phah shithi ruh sha ka Sorkar Jylla bad Sorkar Pdeng haba ïadei bad kane.
“Ngin nym ailad bad ngi ïeng ha kajuh ka nongrim baroh 30 ngut ki dkhot,” la bynrap u CEM.
Ka mat uranium ha Jylla ka la sawa biang hadien ba kawei ka briew kaba don jingïadei bad ka BJP ka la phah shithi sha u Myntri ka Sorkar Pdeng uba peit ïa ka tnat Atomic Energy u Jitendra Singh ba ka kloi ban long ka nongpynshai bad pynsngewthuh na ka bynta ban ïoh tih ïa u uranium ha thaiñ South West Khasi Hills district.
Ha kawei pat ka liang, u Working President ka KHNAM u Bah Thomas Passah u la pynpaw ka jingpyrshah kum ka seng halor ka jingmih pyrthei biang ka mat tih uranium.
“Hadien ba la ïohi ïa ka jingmih pyrthei biang ka kam tih Uranium ha ka jylla ha kaba kawei ka longkmie Khasi lyngba ka kompani shimet ka la phah lane mut phah sha ka Sorkar Pdeng ban sdang biang ka jingtih Uranium. Kum ka seng kaba la pyrshah ïa ka jingthmu tih ïa une u mar poh khyndew naduh basdang, ngi kwah ban pyntip sha baroh khamtam eh sha ka Sorkar Jylla bad ka Sorkar Pdeng ba ngin ïai pyrshah ïa kane ka jingthmu bad ba ka Sorkar Pdeng ka dei ban tep noh ïa kane ka mat,” la ong u Bah Passah.
U la ong ba ka jingsngapjar ka dei ka jingïamynjur namarkata ka seng ka pynpaw ba kan long kaba bakla lada shu sngap ïoh don kiba mut dur da kumwei ïa ki nongrim kiba ka seng ka ïeng. Ngi kyrpad ruh ïa ki para Khasi ba kim dei ban thang biang ïa ka ding ba la lip.”
