New Delhi, Lber 11
Ka Sorkar Pdeng lyngba ka tnat Korbar Ri ha ka Lah Sngi U Blei ka la pynmih ïa ka byrta ban pynbna ïa ka jingpyntreikam ïa ka Citizenship Amendment Act lane ka CAA, bad kane ka la wan hashwa ka jingpynbna ïa ki tarik ban jied ïa ki MP Lok Sabha.
Ka CAA, kaba pynlong ïa ka niam lane ka jingngeit kum ka nongrim ban pynlong nongshong shnong ka Ri India, ka la wanrah ïa ka jingïakynad kaba jur ha ka Ri bad kumjuh ruh ha Meghalaya. Ïa ka CAA la ai jingmynjur da ka Parliament ha u Nohprah 2019, hynrei dei tad haduh mynta ka sngi ba la pynbna ïa ki ‘Rule’ jong kane ka aiñ.
Hadien ka jingpynbna ba la pyntreikam ïa ka CAA, mynta ka Sorkar Pdeng ka lah ban pynlong nongshong shnong bapura jong kane ka Ri ïa ki briew kiba dei na ka niam Hindu, Khristan, Sikh, Jain, Buddhist bad ki Parsi kiba la shah ban beiñ ha Bangladesh, Pakistan bad Afghanistan bad kiba la rung sha India hashwa ka 31 tarik Nohprah, 2014.
Haba ai jingkynthoh, u Myntri Korbar Ri, u Amit Shah, lyngba ka rynsan ‘X’ u la ong, “Ka sorkar jong u Modi ka la pynbna ïa ka Citizenship (Amendment) Rules, 2024. Kine ki ‘Rule’ kin pynlong ïa ki rit paid kiba la shah ban beiñ namar ka jingngeit bad kiba shong ba sah ha Pakistan, Bangladesh bad Afghanistan ba kin shim ïa ka syrnod jong ka jinglong nongshong shnong ka Ri India. Da kane ka jingpynbna, u Myntri Rangbahduh, u Narendra Modi, u la pynurlong sa ïa kawei pat ka jingkular bad ka jingangnud jong ki nongthaw ïa ka Riti Synshar kaba la ai sha ki Hindi, Sikh, Buddhist, Jain, Parsi bad Khristan kiba shong ba sah ha kitei ki lai tylli ki Ri.”
Lah ban kdew ba ha ka ilekshon Lok Sabha ha u snem 2019, ka BJP ka la kular ban pyntreikam ïa ka CAA. Hynrei, ka Sorkar Pdeng ka khlem lah ban wanrah ïa ki ‘Rule’ ki ban pyntreikam ïa ka CAA ha kine ki saw snem tam, bad dei tad haduh ka khyllipmat hashwa ban pynbna ïa ka ilekshon Lok Sabha ba ka sa pynmih ïa ka byrta ban pyntip ba la pyntreikam pura ïa ka CAA.
Kum ban shu pynkynmaw, ka CAA kam treikam ha ki katto-katne ki bynta jong ka thaiñ Shatei Lam Mihngi ba kynthup ïa ki jaka kiba hap hapoh ka Khyrnit Ba Hynriew lane Sixth Schedule kumba long kiba bun bah ki jaka ha Meghalaya.
