Shillong, Lber 11
Ka All India Football Federation (AIFF) ka la pynlong ïa ka jingïalang na ka bynta ka Technical Committee ha ka Sngi U Blei kaba pynbud sa da ka Annual General Body Meeting (AGM) ha ka Sngi U Blei ha Itanagar, Arunachal Pradesh.
Ha katei ka sngi la ïadon lang u President ka AIFF u Kalyan Chaubey ha kaba la ïamir jingmut lang ha kaba ïadei bad kiba bun ki mat kiba kongsan ha ryngkat ka jingïadon lang u Myntri Rangbah ka Arunachal Pradesh, u Pema Khandu, uba la bat kum u president jong ka synjuk ïalehkai phutbol katei ka jylla.
Ha katei ka jingïalang, u Acting Secretary General ka AIFF u M. Satyanarayan u la pynpaw halor ki mat bad khatam ha kaba ïadei bad ka mang tyngka 2024-25. U la ïai ban halor ka jingdonkam ban kyntiew ïa ki kam ïalehkai bad ban pynshlur ïa ki samla ba kin ïashim bynta ha ki jingïalehkai phutbol.
Ka jingïalang jong katei ka synjuk ka la ïamir jingmut lang ruh bad ki rephri jong ka ri kiba la pynpaw halor ka jingdonkam ban pyntreikam noh da ki kot ki bor lyngba ka Video Assistant Referee (VAR) ha ka lympung ïalehkai ba heh duh hapoh ka ri. Hadien la ïatai ruh ban wanrah ïa ki kompani ki ban pynbit pynbiang ïa ka VAR bad ruh na ka FIFA.
Ha kane ka jingïalang la tyrwa ban pyntreikam ïa ka VAR ha ka Indian Super League (ISL) ka ban sdang naduh ka aïom ïalehkai 2025-26. La mynjur ruh ba kine ki mat yn sa wanrah biang ha ka jingïalang kaba ar ka ban long ha ka taiew kaba nyngkong jong u Jymmang mynta u snem.
Kane ka jingthmu ban pyntreikam ïa ka VAR ha ISL kan long ka jingïarap ban kyntiew ïa ka jingïalehkai phutbol hapoh ka ri, ka jingshim rai kaba biang bad ka bym ïashah liang ha ki lympung ïalehkai phutbol.
Kumba ka paw ka la do ka jingbym ïahap hapdeng ki klob ISL halor ki rai kiba bakla ba la shim da ki rephri. Te kumta lyngba ka jingpyntreikam ïa ka VAR, kan long ka jingkmen kaba khraw na ka bynta ki trai jong ki klob, ki coach bad ki rangïalehkai.
