Jerusalem, Lber:
Katkum ki khubor la ong ba ki liengsuiñ shipai ki la leit poi sha Gaza ha ka Sngi U Blei ban leitpynhap ia bun jait ki jingiarap naduh ki marbam haduh ki dawai ki dashin hadien ba la iohi ia ka jingbym sangeh jong ka Israel ia ka thma bad ki trok kit mar ruh kim lah shuh ban leit rung ne leit pynpoi ia ki jingiarap bad ki mar ba donkam sha ki paid nongshong shnong jong katei ka nongbah Gaza.
Katkum ka dur ba la ioh shon da ki nongthoh khubor bad ki nongshon dur na katei ka nongbah, la iohi da ki spah ngut ki nong Palestine ki la leit mareh ban leit pdiang bad shim ia kitei ki mar jingiarap ba la leit ban pynhap da kitei ki liengsuiñ ha katei ka sngi. Kane ka long ruh hadien katto katne bnai kitei ki paidbah kiba shong ha katei ka nongbah ki la hap ban shong tyrkhong bad shong satar khlem ka bam- ka dih bad khlem ki dawai- ki dashin namar ka jingbym ailad na ka liang ka Israel bad kumjuh ruh ki lehnoh Hamas kiba dang iai bteng beit ia ka thma wat hapdeng ka jingkyntu bad jingkyrpad jong kiba dun ki ri bad ki tnat bapher ban sangeh noh shipor ia ka thma khnang ba yn ioh ban pynpoi ia ki lad jingiarap bad ki marbam na ka bynta ki paid nongshong shnong jong katei ka nongbah Gaza jong ka Palestine.
Ka tnat shipai jong ka Jordan ha katei ka sngi ka la pyntip ruh ba ha katei ka jingleit pynhap jingiarap da ki liengsuiñ sha Gaza, ki tnat shipai jong kiwei ki ri ruh naduh ka United States, ka France, ka Belgium bad ka tnat shipai na Egypt ki la leit lang ban pynhap ia ki jingiarap jongki sha katei ka nongbah kum shi bynta ban phah jingiarap kyrkieh na ka bynta ki paidbah nongshong shnong ka Gaza.
Namar la ong ba ki shipai Jordan ki la ioh ban pynhap haduh 37 tylli ki song ha katei ka sngi bad ka la poi kumba 40 tylli da ka jingiatrei lang pat bad kitei kiwei ki ri ban leit pynhap ia kitei ki marbam bad ki jingiarap baroh sha Gaza wat hapdeng ka jingiakhun thma jong ka Israel bad ki lehnoh Hamas kaba khlam sangeh bad khlem ailad shuh wat tang ban leit pynpoi ia ki lad jingiarap ha ka rukom kaba biang da ki trok na ryngkew.
Namar kumba 3 kynta eiei la ong ba ki paidbah nongshong shnong ka Gaza ki la shu ia tuid ban leit shim ia kitei ki jingiarap ba la leit pynhap da kitei ki liengsuiñ shipai jong kitei ki ri bapher ha katei ka Sngi U Blei. La ong ba ki paidbah nongshong shnong naduh ki rangbah haduh ki longkmie bad ki khynnah tang mar ia ïohsngew ia ka jingsawa ki liengsuiñ, da ka jingkmen ki la leit ban mareh bad ban ap lypa ha ki jaka kiba biang bad kiba shngaiñ khnang ba kin ioh ban shim bad ban rah noh sha ki jaka shong jongki ha ka por kaba biang.
La ong ba ki nongshon dur kiba shong na kitei ki liengsuiñ ruh haba ki peit shapoh ka ryngkew, ki iohi ia shibun bah ki jing julor ba ka thma Israel bad ki Hamas ka la wanrah bad pynjot ia katei ka nongbah baroh kawei.
Ka United Nations ruh ka la pyntip ba kiba bun bah ki paid nongshong shnong ka Gaza kumba 2.4 Million khamtam ha ki bynta North jong ka Gaza, ki dei kiba la shong shah thngan namar ka jingkyrduh bam.
Ka tnat ka koit ka khiah jong ka Gaza ruh ka la pyntip ba kumba 23 ngut ki la khlad noh namar ka jingkyrduh bam bad kham bun hi ki dei ki khyllung- khynnah. Ka daw jong ka jingïap jongki la ong ba dei namar ka jingkyrduh bam bad kyrduh um bad na kane ka daw, kitei ki ri bapher kim banse ban pynkloi ban shu leit pynhap noh ia ki lad jingiarap bad khamtam ka bam naka bynta kitei ki paid nongshong shnong kiba la shu im tyrkhong bad im satar mynta la bun bnai.
