Shillong, Lber 11
Ki nongïalam na ka North East Sports Association (NESA) ki la ïakynduh ïa u Myntri Rangbah ka Tripura u Prof (Dr) Manik Saha, lem bad ïa u Myntri ka tnat ïalehkai u Tinku Roy bad ïa ki nongïalam jong ka Tripura State Olympic Association.
Kine ki nongïalam ka NESA ki kynthup ïa u Secretary General u Bah John F Kharshiing bad uba long u Working President ka Meghalaya State Olympic Association (MSOA), u Bamang Tago, Secretary General ka Arunachal Pradesh Olympic Association, ha ryngkat ki ophisar ka tnad ïalehkai ka Tripura.
Ka jingthmu jong kane ka jingïakynduh ka long ban ïasyllok halor kumno ban plie lad ba ki nongïalehkai na ka jylla Tripura ba kin ïoh ban ïashim bynta ha ka 3rd North East Games 2024 ka ban long ha Nagaland naduh ka 18 haduh 23 tarik mynta u bnai.
Kane ka jingleit ban ïakynduh ïa kitei ki bor sorkar ka long hadien ka rai jong ka NESA kaba la rai ban phah ïa kane ka kynhun ba lamkhmat da u Bah John ban leit jurip bad leit sngap ïa ki jingeh kiba mih namar ka jingdon jingmih ar tylli ki kynhun hapoh kane ka jylla kiba ïaknieh ban phah ïa ki nongïalehkai sha ka 3rd North East Games.
Lyngba kane ka jingïakynduh ka NESA ka la lah ban ïasyllok bad ki bor sorkar bad ki bor kynhun ïalehkai bapher bapher ban wanrah ka jingïabeit ha kaba phah ïa ki kyrteng jong ki nongïalehkai na ka jylla Tripura.
