Jowai, Lber:
Ka Myntri ka tnad ka koit ka khiah, ka Dr. Mazel Ampareen Lyngdoh ka la plie paidbah ïa ka Loomkyrwiang Urban Primary Health Centre ha ka jingïalang kaba la long ha phyllaw kane ka jaka ai jingsumar ha ka 8 tarik Lber.
Ha kane ka sngi la donlang u MLA ka Jowai, u Bah Wailadmiki Shylla, u Deputy Commissioner cum Chairman ka District Health Society, West Jaiñtia Hills, u B.S. Sohliya, ka District Medical & Health Officer, Dr. Evalyneda B.V. Laloo, u President ka Kur Soo Kpoh Khadar Wyrnai, uba dei ruh u Dolloi ka Elaka Jowai, u Puramon Kynjing, ki doktor ki nos bad kiwei-kiwei.
Ka Dr. Ampareen Lyngdoh ha ka jingkren ka pynpaw ka jingsngewnguh ïa ka Kur Sookpoh Khadar Wyrnai kaba la ai sngewbha ïa ka jaka ban tei iaka Urban Health Centre ka ban ïarap bad pynmyntoi ïa u ne ka nongshong shnong.
Ka la ong ruh ba ka jingplie ïa ka Health Center ha kum kane ka sngi kyrpang jong ki kynthei ka la nang pynkyrpang shuh-shuh ïa ka jingïalang bad ka pyni ruh ïa ka jingtrei shitom ban pynïoh ïa ka koit ka khiah na ka bynta ki kynthei.
Nalorkata ka Dr. Lyngdoh ka kdew ruh ïa ka jingdonkam ban pynkup bor ïa ki kynthei da kaba pynïoh ha ki ïa ki jingsumar kiba biang.
Ka Myntri ka kyntu ruh ïa ki nos ban pynleit jingmut bad shimkhia ïa ka jingkoit jingkhiah jong ki khynnah samla khamtam kito ki khynnah kiba dang khie samla.
