Kohima, Lber:
U Myntri Rangbahduh u Narendra Modi u la pyllait paidbah ïa kiba bun ki projek ban wanrah ïa ki kam pynroi kiba la palat ïa ka T. 55,000 klur ha thaiñ Shatei Lam Mihngi, kynthup ka jingtyrwa ban pyntreikam ïa ki jingai jingkyrshan ba palat ïa ka T. 1,700 klur khamtam na ka bynta ka jylla Nagaland. Kane ka jingpyllait paidbah ka la long ha ka por ba la don ka prokram ‘Viksit Bharat Viksit North East’ ha Itanagar ha ka sngi Saitjaiñ.
Napdeng ki projek ba kham kongsan ba la wanrah na ka bynta ka Nagaland, u Myntri Rangbahduh u la plie ruh ïa ki mawnongrim na ka bynta ka Unity Mall ha Chümoukedima distrik bad kyntiew shuh shuh ruh ïa ka 132 kv Sub-station ha Nagarjan kaba don ha Dimapur. Shuh shuh u la plie ruh ïa ki projek kiba ïadei bad kiba bun ki surok.
