Shillong, Lber 10
Ka Federation of Khasi Jaiñtia and Garo People (FKJGP) Sengkmie ha ka Sngi Saitjaiñ ka la leit ban ai mynsiem bad pynshlur ïa ka kynhun JETS 24×7 ban pynïaid ïa ka kam kamai thuk-thuk hapoh ka jylla.
Ka FKJGP kum shibynta ban pynshlur bad ai mynsiem ïa ka kynhun JETS 24×7, kaba dei kawei na ki kynhun kaba nyngkong tam na ka jylla kaba dang shu ïoh shen ïa ka jingithuh na ka sorkar jylla ban pynïaid ïa ka kam kamai thuk thuk (Two wheelers) ha ka jylla, ka la pynlong ïa ka jingïalang pynkup burom ha shlem treikam jong ka seng kaba don ha Mawlai Kyntonmassar, ha kaba la ïadonlang da ki nongïalam kiba hakhmat ka seng bad kumjuh ruh ki dkhot na ka kynhun JETS 24×7.
Ïa katei ka jingïalang la pynïaid da u Bah Dundee Cliff Khongsit, President FKJGP Sengkmie uba la maitphang ba kum ka seng kaba don ïa ka jingangnud ban kyntiew ïa ka ïoh ka kot ha ka jylla bad ban pynshlur ïa ki khun samla ban ïeng ha la ki jong ki kjat khnang ba kum ki trai ri trai muluk kin bat hi ïa u lakam jong ka khaii – pateng.
U la ong ba ka dei ka kamram jong ka seng ban shim ïa kane ka sienjam ban pynkup burom kyrpang ïa ka kynhun JETS 24×7 kaba la trei minot khlem shongthait tad haduh ba kan da ïohpdiang ïa ka jingithuh na ka sorkar ban pynïaid ïa ka kam kamai thuk thuk (Two wheelers) ha ka jylla.
Haba kren ha katei ka jingïalang pynkup burom, u Bah Eldie N Lyngdoh, General Secretary FKJGP Sengkmie u la ong ba kum ka jaidbynriew ka la dei ban bret noh shaba sep ka sngi ïa ki kyntien phlan duman kiba ong ba ki jaidbynriew ki long kum ki tham kiba ïaleh ban tan uwei ïa uwei hynrei kum ka jaidbynriew yn pyneh rngiew pat da kaba yn long ki nongkyrshan bad nong aibuit ban kyntiew iwei ia iwei.
U Senior Vice President Bah Elton Cliff Warjri u la lyntu ïa ka kynhun JETS 24×7 ba kin long kiba peitngor ba ki nongleit nongwan (Passenger) kin ïoh ïa ka jingshngaiñ ha ka leit ka wan bad ha kajuh ka por ruh ban teh lakam na ki nongshim kabu kiba pyrshang ban khñiot dor na ki paidbah.
Haba pynpaw ïa ka jingsngewkmen bad sngew ïoh mynsiem ha katei ka sngi, u Bah Pynskhemlang W Uriah, Managing Director JETS 24×7 u la ai khublei kyrpang ïa ka FKJGP kaba la ju ai lang ka kti ka mon ka kti kadiang na ka por sha ka por haba kum ka kynhun ka donkam ïa ki jingai jingmut jong ka seng, ha kaba u la bynrap ruh da kaba ong ba kane ka dei ka sien kaba nyngkong eh ba kum ka kynhun kan ïoh ia ka jingshah pynkup burom bad kum ka kynhun kan ïai pyrto bad kan ym klet ïa ka FKJGP ha kaba u la ong ruh ba kum ka kynhun hi kan ïaleh ban trei shitom ban pynïar ïa ka rukom treikam ban long kum ka jingplie lad plie lynti ïa ki khun samla jong ka jylla ha ka ïoh kam ïoh jam.
