Jowai, Lber:
Ka Loompyrdi Ïongpiah UPS, SSA kawei na ki shlem ai jinghikai kaba la seng ha u snem 2000, ha ka 9 tarik Lber ka la sdang ïa ka jingrakhe jong ka jingdap 25 snem ka jingïaid lynti ban ai jingshakri ïa ki khynnah ha ka liang ka pule-puthi.
Ïa kane jinglehkmen ‘Silver Jubilee’ yn pynkut ha u snem ban wan.
Ïa ka jingïalang la pynïaid da u Bah C. Tympang Laloo, Chairman SMC bad la ïoh ki kyntien nguh-blei nguh-syiem na ka Kong Riïanom Passah, Member SMC, katba ïa ka khana shaphang ka skul la pynsngew da u Bah O.H. Toi, Founder Secretary bad ki jingkren lyngkot na na ka Kong Neetu Shullai, Head Teacher, Loompyrdi Ïongpiah UPS SSA, Bah R.L. Bimee Suwer, Waheh Chnong Loompyrdi Ïongpiah nalor kiwei-kiwei.
U Bah Toi ha ka jingkren u la ong ba ha ka thong ka long ban kyntiew ïa ka pule-puthi bad ka jingnang jingstad ha ki nongshong shnong ka distrik, bad ka SMC ka don jingmut ban kyntiew kyrdan ïa kane ka skul bad ban shna ruh ïa ka ïing skul ha ka jaka kaba don ha Chyrmang kaba ïahap katkum ka juk ka por kiba ka Dorbar Shnong ka la dep ban pyrkhat sani bha.
Ka Kong M. Lakiang, District Mission Coordinator, SSA, West Jaiñtia Hills kum ka kongsan, ka la ïaroh ïa ki bor pynïaid skul, ki nonghikai, ki kmie ki kpa kiba ïatreilang ryngkat-ryngkat ban kynjoh sha u mawmer ba 25 tylli ki snem.
Ka la kitbok kitrwiang ïa ka skul ba kan nang kiew katkum ka jingïalam jong ka juk ka por bad kum ka dak ban don bynta lang bad kane ka skul ha ka jinglehkmen ‘Silver Jubilee’. Ka Kong M. Lakiang ka la synñiang `20,000 sha ka ïarong pisa jong ka skul.
Ka Kong M. Lakiang ka la plie pyrda ïa ka ‘Mascot Silver Jubilee Celebration’ bad pynkup burom ruh ïa ki nongseng ïa ka skul bad sam syrnod sha ki nongjop ha ka jingïakop ‘Drawing bad ‘Painting’.
La pynphuh pynphieng ïa ka jinglehkmen da ki jingrwai jingshad ba la shim bynta da ki nonghikai, ki khynnah skul ka Loompyrdi Ïongpiah kumjuh ki khynnah skul ba hap hapoh ka Ïongpiah Cluster ba kynthup ïa ka Chilliangraij UPS SSA, Pohmusiang, UPS, SSA, Panaliar UPS SSA, Little Flower UPS, SSA bad ka Seiñraij UPS.
