Shillong, Lber 11
Tang hadien shi sngi tam, ki pulit ka East Khasi Hills ki la ïoh ban kem noh ïa 2 ngut ki briew kiba la suba donkti ha ka jingpynbthei ïa u bom IED ha jaka ïeng bos Syndicate kaba ha Them Ïew Mawlong ha ka miet jong ka Sngi Saitjaiñ.
Napdeng kitei kiba la shah kem ha ki pulit, la ong ba uwei u dei u nongïalam jong ka Hynñiewtrep National Youth Front (HNYF) bad uba bat ruh ïa ka kam Disciplinary Secretary ba la tip kyrteng kum u Bah Tarson Lymba ba la 55 snem ka rta bad uwei pat u dei ba la tip kyrteng kum u Ebakordor Nongpluh ba dang 26 snem, uba la shah kem ha ka miet Sngi U Blei.
U Superintendent of Police (SP) ka East Khasi Hills u Rituraj Ravi, u la pyntip ba u Ebakordor Nongpluh u dei na West Jaiñtia Hills bad u Bah Tarson Lymba ruh u dei na West Jaiñtia Hills.
Hadien ka jingbthei jong u bom IED ha ka miet Sngi Saitjaiñ, ki pulit ki la pynlong ïa ka jingtohkit kaba mar-mar bad ban thwet ïa kiba donkti ha kane ka kam. Kumta ha ka sngi kaba bud ki la kem noh ïa u Ebakordor na Shillong bad ïa u Tarson Lymba na Dawki.
La ong ba u Bah Tarson u dei ruh uba ju ïalam lynti ïa ka kynhun ïakren ïasuk jong ka Sorkar haba leit shaw ïa ki nongïalam ka HNLC kiba wan sha ka miej ïakren ïasuk ha ki bnai ba la leit noh.
Ïa kine ar ngut kiba la kem la leit ïalam ruh sha ïingbishar ban tian bishar. Na ka liang ka ïingbishar ka la hukum ban set 10 sngi ha along ki pulit ban ïoh tohkit bniah.
