Shillong, Lber 11
Ka Hynñiewtrep National Liberation Council (HNLC) ha ka Lah Sngi U Blei ka la pynrem jur halor ka jingshah kem u dkhot ka HNYF, Bah Tarson Lymba halor ki jingkynnoh ba khlem nongrim ba u donkti ha ka jingbthei bom IED ha Them Metor.
“Kane ka dei ka buit kaba la rim kaba ju pyndonkam da ki pulit haba kim lap ksai bad kumta ki kem naphang katba ïoh,” la ong u General Secretary-cum-Publicity Secretary ka HNLC, Bah Saiñkupar Nongtraw ha ka kyrwoh khubor.
Ka seng ka la ong ruh ba u Bah Lymba u la don bynta tang ha ka jingïakren ïasuk bad um dei satia u dkhot ne u nongkyrshan ka HNLC, hynrei u shu synran lang ïa u Bah Sadon, u ksiang jong ka seng ha ka jingïakren ïasuk.
“Lada ki nongwanrah jingsuk ne ki ksiang ki shah pyndik bad shah kem ha ki pulit, mano shuh napdeng ki nongshong shnong ba don ka jingsngewkhia ki ban shaniah ha ka bor synshar ne ka Sorkar lada ka HNLC ka wan biang sha ka jingïakren ïasuk?” la buh jingkylli u Bah Nongtraw.
Haba kdew ba ka Sorkar ka la saiñdur bad pynïap ïa u Bah Cheris – u nongrah ktien, utei u nongïalam ka seng u la ong ba ka long ka jinglehraiñ ïa ki ‘riew saiñ-pyrthei ka Jylla kiba dei ban long ki nongïada ïa ka synshar paidbah, hynrei mynta ka Jylla ka la kylla long pynban ka jaka ha kaba ka jingsynshar bad ka bor ka shong ha kiba riewspah.
“Kaba sngewlyngngoh ka long ba sa uwei pat u briew uba la tip kyrteng kum u Bah Ebakordor Nongpluh u la shah kem haba ïadei bad katei ka jingjia.
Katkum ki jinglum jingtip jong ngi, u Eba u dei tang u nongsyntiat ki pulit,” la ong u Bah Nongtraw.
Haba pynsngew ba ka HNLC kam pyrshah ïa ka suk ka saiñ, u la ong, “Ngim dei kiba leh donbor hynrei kiba shah leh donbor. Lada don kiba tuh ïa ka jaka jong ngi, hato phi sngew kin ïoh jingsuk? Ha kine ki 76 snem ba la dep, ka India kam shym la mad ïa kano-kano ka jingsuk, bad kan ym lap hi ruh ïa ka. Ym lah ban tei ïa ka jingsuk halor ka jingleh shiliang, jingleh donbor, jingñiew beiñ, ka jingleh be-aiñ, ne jingduh jingshaniah namar ym don jingsuk ka ban ïeng halor ka jingbym hok, jingshet kylla, ka jingleh be-aiñ ne jingsynshar donbor.”
U la ong ruh, “Nga la pule ïa ka histori jong ka ‘Bharat’….ka histori jong phi, bad ka kdew ba phi dei u nongpynïap, u nongwan rung be-aiñ, nonghiar thma, u nongtuh, nongrahbor, nongshukor, u nongbom ïap, u nongleh be-ijot bad u runar. Nalor kane, na ka por sha ka por phi la pynkheiñ ïa ki jingïateh bad jingïamynjur ha man la ki Hima. Ka long mar khongpong ïa phi ban kyrshan na bynta ka jingsuk bad ka jingjai-jai, ka hok bad ka synshar paidbah.”
Ha kajuh ka por u la pynpaw ka jingsngewsih ba ki ‘riew saiñ-pyrthei ka Hynñiewtrep ki la shah ïalam, pyndonkam bad pynbor ha ki nongshun bad nongleh donbor bad ki trei kum ki ‘agent’ bad shah pynshad na bynta ka Sorkar India.
“Ka mat treikam ba pynïaphiah bad pyndonkam jong phi pyrshah ka ri jong ngi ka dei kaei-kaei kaba phin hap ban mad. Ka hok, lym kumta!” u la ong.
Shuh shuh u General Secretary u la bynrap, “Phi la don bynta ha ki ‘fake encounter’ bad pyndkoh ïa ki dkhot jong ngi. Phi la pynïap ïa u Bah Cheris, rahbor ïa u Sibsing Syiem, pynbor ïa u nongïalam jong ngi – u Wickliff Syiem ban shah pynryngkang par, shah set along bad pynsaja ïa man la ki nongïalam Hynñiewtrep kiba phim sngewtynnad. Phi lah ban mutdur ba ngi sheptieng bad ba ngin phet na phi, hynrei em, ngin mareh sha phi.”
