Shillong, Lber
U MLA ka Mawkynrew konstitwensi, Bah Banteidor Lyngdoh, u la ong ba bunsien, ka jingnoh synñiang ka jong u sha ki skul kiba don ha kane ka konstitwensi kam ju long lehnohei.
Ïa kane, u Bah Banteidor u la kren ha ka 8 tarik Lber ha ka por ba u la leit ban aiti ïa ka bos ban kit khynnah skul sha ka Holy Cross Higher Secondary School bad ban plie ruh ïa ka ïing skul bathymmai jong ka Mawkynrew Presbyterian School.
Ïa ka bos, u MLA u la pynïoh lyngba ka mang tyngka kaba long T. 18 lak lyngba ka Chief Minister’s Special Development Fund (CMSDF) katba ka ïing skul jong ka Mawkynrew Presbyterian pat ka dei kaba la shna na ka mang tyngka jong ka Special Rural Works Programme (SRWP) 2022-2023 lane ka MLA Scheme kaba long `8 lak.
Ha ka jingïalang ha Holy Cross Higher Secondary School, ki nongïadon bynta ki la pynpaw ïa ka jingsngewkmen bad jingsngewnguh ïa u MLA ka thaiñ. Na ka liang u Bah Banteidor pat u la pynbna ban ai sa `10 lak ban pynheh ïa ka ïing skul kumba la ïamir jingmut bad ki bor pynïaid jong kane ka skul.
Haba ïashim bynta pat ha ka jingïalang ha Mawkynrew Presbyterian School, u Bah Banteidor u la kular ba un peit bniah ïa ki jingdonkam ban nang pynbha ïa kane ka skul.
Ka phang jingkren u Bah Banteidor ha kine ar tylli ki jingïalang ka long halor ka jingangnud jong u ban kyntiew ïa ka pule puthi ha kaba u la ong, “Ka jingnang ban thoh bad pule (Literacy Rate) hapdeng ki nongshong shnong ka la kiew bha haba ïanujor bad kiwei pat ki snem.”
Nalorkata, u la kyntu ban don ka jingïatreilang na ka por sha ka por ban kyntiew kham bha ïa ka thaiñ baroh kawei ha ki liang bapher-bapher.
