Shillong, Lber 11
Ka HYC-Sengkmie ka la kren shai ba ka pyrshah jur halor ka jingthmu tih ‘Uranium’ hapoh ka Jylla bad ka la maham tyngeh ruh ïa kito kiba pyrshang ban khyllie biang ïa ka mat haba ïadei bad utei u mar poh khyndew.
U President ka seng, Bah Roy Kupar Synrem ha ka kyrwoh khubor u la ong ba ka seng ka kwah ban phah khubor sha baroh ki mennong (Agent) jong ka Sorkar India ne Sorkar Jylla ba ki dei ban sangeh shi syndon ïa kino-kino ki jingthmu jong ki – ban pyrkhat ne mutdur ban khlong lane tih ‘Uranium’ na ka Bri U Hynñiewtrep.
“Kum ka seng, ngi skhem ha ka nongrim bad ka jutang ba ngi lah khlei ba da lei-lei ruh em ngim shah ban khlong ïa une u mar poh khyndew na kane ka Ri jong ngi. Kumba ngi la dep ban kren naduh ki sngi bad ki snem kiba lah dep, haduh mynta ka kynti ruh ngi ïaineh skhem ba ngi pyrshah jur ïa kano-kano ka jingpyrshang ban khyllie biang ïa ka kitab tih ‘Uranium’ napoh kane ka Ri jong ngi,” u la ong.
U Bah Synrem u la ong ruh ba kum ka seng, ka long la kloi ban ïakhun da kano-kano ban pyntikna ba ka Sorkar India ne ka Sorkar Jylla kan ym ïoh lad ban pyrshang pynim biang ïa kane ka mat.
“Kan bha ba ngin ïakhun mynta ban ïa kaba ieh ban ïap bad duh jait ka Jaidbynriew lyngba kane ka bih jong u ‘Uranium’,” u la ong.
Ka seng ka pynrem jur bad maham tyngeh ruh ïa ka Kong Elizabeth Nongbri bad ïa kiwei kumjuh, ba kim dei ban pyrshang mushlia lap-lah ïa kane ka kam ïap kam im jong ka Jaidbynriew.
“Lehse kane ka briew ka kwah ban sngewthuh ïa ka sur jong ki khun samla bad ki dkhot ka Jaidbynriew bad hadien pat ka pyrshang ban len noh ïa kaei kaba ka lah dep ban thoh,” la ong utei u nongïalam.
Shuh shuh u la bynrap, “Kum ki sengbhalang ne ki kynhun bapher-bapher, ngi lah ban don ïa shibun ki jingïapher ha ki lama ba ngi don, hynrei ngi long kawei ka jingmut bad ka jingthmu bad ‘kata ka long ban ïada bad pynneh-pynsah bad khamtam eh ban ïaleh khlem kynran dien na bynta la ka Jaidbynriew’.”
