Shillong, Lber 11
Ka Hynñiewtrep National Youth Front (HNYF) ka la ong ba kam lah satia ban pdiang halor ka jingshah kynnoh donkti jong u dkhot ka seng, u Bah Tarson Lymba haba ïadei ka jingbthei bom kaba la jia ha Them Ïew Mawlong ha ka miet Sngi Saitjaiñ.
U Bah Lymba (58 snem ka rta) bad u Bah Ebakordor Nongpluh (26 snem ka rta) ki la shah kem noh ha ki pulit ha ka miet 10 tarik mynta u bnai na Dawki bad Shillong halor ka jingkynnoh donkti ha katei ka jingjia.
“Ngi la pyrshang ban kylli halor kaei ka mukotduma kaba la kem ïa u (Lymba). Na ka liang u SP u la ong ba ki don ki jinglap ksai ki pulit ba u donkti haba ïadei bad ka jingpynbthei bom ha Them Metor,” la ong u President ka HNYF, Bah Sadon K. Blah haba kren sha ki lad pathai khubor hadien ka jingïakynduh ïa u SP ka East Khasi Hills, u Rituraj Ravi ha ka Lah Sngi U Blei.
U la ong ruh ba u Bah Lymba u dei u dkhot uba la rangbah jong ka seng. Ha kajuh ka por, u Bah Blah u la ïathuh ba u la pynsngew ha u SP ba kum ka seng kam lah satia ban pdiang ba u Bah Lymba kum u Disciplinary Secretary ka HNYF un donkti ha katei ka kam.
Ha kawei ka liang, u la ong ba ka seng kam kwah ban tuklar halor ka jingtohkit ka tnad pulit, hynrei ka shu pynsngew ba kam lah pdiang satia ïa katei ka jingkynnoh namar u Bah Lymba u dei u rangbah uba jai-jai bad uba la heh ha ka rta.
“Nga la ïa treikam lang bad u la 20 snem bad ban ong ba un leh shongshit ïa kano-kano ka kam bad ba un ïaid ïa ka lynti ka bym dei ruh ngam lah ban pdiang bad ngam ju kham lap hi ruh kum kata,” u la ong.
Halor ki jingpynbthei bom kiba la jia ha kylleng-kylleng, u Bah Blah u la ong ba haba ïadei bad ka jingpynbthei bom ha Them Metor, ban shu kynnoh ïa kata ka seng bad ki nongïalam jong ka, ka long kaba bakla naba ka mat halor ka Them Metor ka dei u shiah ba thar ha ki pyllew khmat jong baroh naba la i donkam ban pynkynriah noh ïa katei ka jaka.
“Nga sngew ba ka dang donkam ïa ka tnad pulit ban leh ‘homework’ namar ka jingbitar u paidbah halor ka jingbym lah leh eiei ka Sorkar ïa ka Them Metor ruh ka dei kawei ka daw ba mano ba pynbthei bom – ka dei ka kam jong ki pulit ban da bud bniah bha, ym ban shu ñion ne ban shu kem suk ïa ki nongïalam sengbhalang,” u la ong.
Utei u nongïalam u la ong ruh ba ka jingbitar ïa ka Them Metor ka dei ka mat jong uba bun ba lang ïa kaba ka Sorkar mynta ka shu kut tang ha ki ‘High Level Committee’ khlem poi shano-shano.
“Ka tnad pulit kan hap pyrkhat bha ïa kane ka phang,” u la ong. Haba kylli, u Bah Blah u la ïathuh ba naduh ba sdang ka jingïakren ïasuk, une u rangbah (Lymba) uba sah ha Dawki, naduh ka sngi nyngkong ba leit shaw ïa ki dkhot ka seng (HNLC) ryngkat ki ophisar Sorkar lem bad ka tnad pulit u la ïadonlang.
“Lada ym don une u Bah, ngin ym tip ban leit shaw ïa ki namar nga ruh ngam da tip bha naba ka dei ka shnong khappud kaba sha kyndong bah bad donkam ïa ka jingïarap jong u…naduh ba u la ïarap naduh ba sdang, u donkti beit ha man ki jingïalang, jingïakynduh, u don lang beit bad ngi ïakren ïa khana lang beit. Hynrei kumba nga, nga donkti ha ka jingïakren ïasuk, ma u ruh u donkti lang ha ka jingïakren ïasuk, lait nangta ngim don bynta da kumwei pat,” la pynshai u President.
Shuh shuh u la bynrap, “Kane ka dei ka kam jong ka Sorkar ban ñion ïa ki nongïalam sengbhalang khamtam ïa kito kiba la ñiew ba ki don jingïadei bad ka HNLC.”
