Shillong, Lber 11
Hadien ba u la nangïoh bor na ka jingmynsaw ka kjat, u rangïalehkai kriket ka ri u Mohammed Shami u lah ban wanphai sha ka jingïalehkai ha la ïing pyrshah ïa ka Bangladesh ka ban long ha u Nailur mynta u snem, la pynpaw u secretary ka BCCI u Jay Shah ha ka Lah Sngi U Blei.
Kane ka mut ba u Shami u lah ban duh ïa ka lad na ka bynta ka T20 World Cup. Ha kane ka lympung ïalehkai jong ka ICC yn ïasoh lang ka West Indies ka ban pynlong ïa kane ka lympung lem bad ka USA ha u Jylliew mynta u snem.
Utei u rangïalehkai ba la 33 snem karta uba duh ïashim bynta dangshen ha ka jingïalehkai Test kaba khatduh pyrshah ïa ka England bad ruh na ka bynta IPL hadien ba u la leit shah sumar na ka jingmynsaw ka kjat ha u bnai ba la lah.
“U Shami u la lah ban pyndep ïa ka jingshah sumar, u lah ban wanphai biang sha ka kynhun ïalehkai ka ri India. Kane ka jingwanphai u Shami ka lah ban pynlong ïa u na ka bynta ka jingïalehkai pyrshah ïa ka Bangladesh. U KL Rahul uba donkam ban shah ai injek, u hap ban sdang ïa ka jingkilanmet ha NCA,” la ong u Jay Shah.
U Shami u la ïalehkai khatduh na ka bynta ka India ha ka ODI World Cup ha kaba u la lah ban ïalehkai bha.
Ka India kan ïakhun pyrshah ïa ka Bangladesh na ka bynta ki ar tylli ki jingïalehkai Tests bad lai tylli ki jingïalehkai T20 Internationals ha u Nailur mynta u snem.
Ha kawei pat ka liang u KL Rahul u la ïalehkai ha ka Tests kaba khatduh pyrshah ïa ka England hadien ba u la mynsaw ha ka kjat kamon. Da ka jingthmu ban wanphai na ka bynta ka Lucknow Super Giants ha ka IPL, une u rangïalehkai u la leit shah sumar sha London.
