Shillong, Lber 12
Ka Shillong Sports Association (SSA) ka la pynbeit ba kan sdang noh ïa ka lympung ïalehkai Shillong Premier Division Football League Tournament 2023 ha ka 18 tarik mynta bnai ha SSA Stadium, Polo.
Ki phra tylli ki kynhun ki ban ïashim bynta ha kane ka lympung ki kynthup ïa ka lahduh jong ka aïom ba la dep (2022) ka Mawlai Sports Club, kumjuh ka lahduh jong ka Meghalaya State League ka Rangdajied United FC, Nangkiew Irat SC, Shillong Lajong FC, Lang-sning FC, Ryntih FC lem bad ar tylli kynhun kiba la kiew kyrdan na ka First Division kata ka Nongthymmai SC bad ka Sawmer SC.
Ki kynhun ki ban ïakhun ha kane ka sngi sdang (18 tarik) kin long hapdeng ka Nongthymmai pyrshah ïa ka Rang-dajied United ha ka por 3 baje noh phai sngi.
Wat la na ka liang ka SSA dangshen ka la pynbna ban sdang naduh ka 20 tarik, hynrei na ki daw ba ïatyngkhuh bad ka lympung ïalehkai I-League ha kaba ka TRAU kan pynkhreh ïa ka jingïalehkai ha la ïing pyrshah ïa ka Neroca ha ka 21 tarik, la hap ban pynkynriah noh ïa katei ka sngi sdang. Ka TRAU ka la pynlong ïa ka SSA Stadium kum ka jaka ïalehkai ha la ïing (home match) na ka daw ka jingbym shongshngaiñ ban pynlong ïa ki jingïalehkai ha Imphal.
