Shillong, Lber 12
Ka Shillong Lajong FC kan pynkhreh ïa ka jingïakhun pyrshah ïa ka Real Kashmir FC ha ka lympung ïalehkai I-League ha ka janmiet jong ka Sngi Balang ha SSA Stadium, Shillong.
Kane ka kynhun ïalehkai na nongbah hapoh ka jingïalam u Bah Bobby L. Nongbet, ka la lah ban pynliem dangshen ïa ka Aizawl FC da 2-1 kol bad ïai sah ha ka kyrdan ba hynriew lem bad 29 point. Na ki 18 sien ïakhun, ka Lajong ka la lah ban ïoh jingjop phra sien, ïakhaid san sien bad shah rem san sien.
Lah ban pynkynmaw ha ka jingïalehkai kaba khatduh ha la ïing, ka Lajong ka la shah pynïakhaid da mar 4-4 kol ha ka Rajasthan FC. Kane ka la wan hadien ba ka Lajong ka la shah pynphai haduh ar kol ha shwa ban kut artad ka jingïalehkai ha ka minit kaba 90+4 & 90+6.
Katei ka jingshah pynïakhaid ka la pynbitar ïa kiba bun ki paidbah nongkyrshan kiba la wan sakhi ïa katei ka jingïalehkai bad wat kito kiba la kynthoh hapoh ki social media namar ki la ong ba kumno kan shah thep haduh ar kol kata ruh shwa ban wai artad ka jingïalehkai.
Kumta ha kane ka jingïakhun kaba mynta pyrshah ïa ka Real Kashmir ki la pynpaw ba ka Lajong kam dei ban dang ïai bteng ban ailad biang ban shah thep kumba ka la jia ha ka jingïalehkai kaba la dep ha la ïing. “Ngi khmih lynti ba ka Lajong ka dei ban ïalehkai bha naduh mynsiem bad kam dei ban shu ai thep suk ha ka liang pyrshah. Ha ka jingshisha kum ka kynhun ka dei ban don ïa ka jingsngewskhem haba ka ïalehkai ha la ïing namar ka don ryngkat bad ki paidbah nongkyrshan, te kumta ka dei ban sei bor bah ban pyni ïa ka sap ïalehkai ba kyrpang,” la pynpaw ki katto katne ki riew paidbah kiba ju wan ban ai jingkyrshan ïa ka Lajong ha ki jingïalehkai ha la ïing.
Ha kawei pat ka liang, u Bah Bobby u la pynpaw ïa ka jingkhmih lynti ba ka kynhun kan ïalehkai bha kumba ka la lah ban ïakhun tyngeh pyrshah ïa ka Aizawl FC. “Nga kyrmen ba ngin ïoh ban khur ïa ki lai point ha kane ka jingïakhun.”
Ha kawei pat ka liang ka Real Kashmir ka dei ka kynhun kaba la don ha ka kyrdan balai bad kamai 34 point na ki 18 sien ïakhun. Kane ka kynhun ka la jop shiphew sien, ïakhaid saw sien bad shah rem saw sien.
