Islamabad, Lber:
U Asif Ali Zardari ha ka Sngi U Blei, u la bam smai kum u President bathymmai bad ba khatsaw (14) jong ka Pakista. Kane ka wan urlong hadien ma u bad ka seng jong u ki la lah ban pynkhie im biang ia ka kam saiñ pyrthei jong ka seng ha ka sien kaba ar.
Ha katei ka sngi, la pynbam smai ia u da u Chief Justice ka Pakistan- u Qazi Faez Isa. U Zardari u la don 68 snem ka rta ha kane ka por bad la pyndep ia katei ka jing- bam smai ha Aiwan-e-Sadr.
Kumta, la ong ba u Zardari u la shim bujli noh ia katei ka shuki President na ka jaka jong u Dr Arif Alvi, uba la bat tam ia katei ka shuki kumba 5 bnai hadien ba u la pyndep ia ka samoi treikam ba 5 snem jong u ha u Nailur jong u snem 2023.
Ia katei ka jing-bam smai la ïadon bynta lang ruh da u Myntri Rangbahduh ka Pakistan- u Shehbaz Sharif, u heh ka tnat shipai- u General Asim Munir bad u Chairman jong ka Joint Chiefs jong ka Staff Committee- u General Sahir Shamshad Mirza bad kumjuh ruh kiwei kiwei de ki heh bad ki nongialam bapher kiba la ioh ban ïadon bynta ban sakhi ia katei ka jingthung President thymmai ha katei ka sngi.
Ha katei ka sngi, la ong ba u Mr. Alvi uba long u President barim ka Pakistan bad uba long ruh u nongialam ka seng Tehreek-e-Insaf Party jong u Myntri Rangbahduh barim- u Imran Khan, u la leit ban ïadon bynta lang ha katei ka jingpynbam smai.
Kiwei pat ki nongialam kiba ïadon lang ban sakhi ha katei sngi ki kynthup ia u Myntri Rangbahduh barim ka Pakistan- u Nawaz Sharif bad u khun jong u Zardari bad kumjuh ruh ki khun jong u bad kiwei kiwei de.
