Shillong, Lber 12
Ka Harijan Panchayat Committee (HPC) ha ka Sngi Ba-ar ka la kyrpad ïa u Myntri ka tnad Pohïing ka Sorkar Pdeng, u Amit Shah ban tuklar mardor halor ka jingbthei bom IED ha Punjabi Colony.
Ka HPC ha kajuh ka por, ka la kyrpad ïa u Shah ban shimkhia ïa ka mat halor ka Punjabi Colony da kaba kynthup lang ïa ki lai mamla ha ryngkat ka Sorkar Jylla.
“Nga thoh sha phi ban pynpaw ka jingsngewkhia halor ki jingjia ba dang shen kaba la pynkhynñiuh ïa ka jaidbynriew jong ngi,” la ong u Secretary ka HPC, u Sardar Gurjit Singh ha ka shithi ba la phah sha u Myntri ka tnad Pohïing ka Sorkar Pdeng, u Amit Shah.
U la ïathuh ba ka miet jong ka 9 tarik mynta u bnai, ha ka por kumba 10:30 baje eiei, ka shong suk shong shngaiñ jong ki ka la shah pynthut lyngba ka jingbthei u bom uba la kynnoh ba dei u IED hajan ka jaka ïeng bos – ban rung shapoh Punjabi Colony.
“Kane ka jingthombor ym tang ba ka la ïalam sha ka jingjulor jong ki jingdon-jingem ba hajan, hynrei ka la pynsaphriang ïa ka jingsheptieng hapdeng kiba shong ba sah ha kane ka jaka,” u la ong.
U Singh u la ïathuh ruh ba ki kynroh bad ki jingkhang-ïit jong kiba bun tylli ki ïing ba marjan bad ki dukan ba kynthup ïa ka jaka tong um ki la julor lut.
U la ong ruh ba u Lakhan Singh, u nongïalehkai kriket ka Jylla, uba shong ba sah ha ka imlang-shalang jong ki, u la mynsaw jur na katei ka jingleh ba khawpud.
“Ka long kaba donkam ban kdew hangne ba ki Sikh jong ka Punjabi Colony khamtam kiba sah hangne ki la mad ïa ki jingshah byrngem na ki kynhun trai-ri bapher-bapher lyngba ki lad pathai khubor na ka por sha ka por naduh ba jia ha ka jingthombor ha u 2018. Kine ki kynhun ki la pynpaw shai ïa ka jingbym sngewtynnad haba ïadei bad ka jingdon jong bar-jylla hapoh Meghalaya, ha kawei ka liang kaba wanrah ïa ka jinglong-jingman jong ka jingpyntieng jingpynsmiej. Ki la don ruh ki jingthombor ïa ki Sikh. Ym shym la leh eiei ne pynsangeh ban pynsaphriang ïa ka jingisih bad ka jingshah liang,” la ong u Secretary ka HPC.
U la ong ruh ba ka mukotduma haba ïadei bad ki hok bad ka shong ka sah jong ki dkhot ka jaidbynriew jong ki, ka long ‘subjudice’ – ha ryngkat ka jingpyrshang na ka liang ka Sorkar Jylla, HPC lem bad kiwei-kiwei ki nongshong shnong ba don ka jingsngewkhia ban poi sha ka jingïabeit lyngba ka suk ka saiñ.
“Wat hapdeng kiba bun ki jingïalang bad ki jingïamir jingmut, ym shym la ïohi ïa kino-kino ki kam. Wat ki jingkular ban tuklar na ka liang ka Sorkar India, kaba la pynsngew hashuwa, kim pat shym la urlong. Ngi kyrmen skhem ba lada ka Sorkar Pdeng ka shim ka sienjam ban pynbeit ïa kane ka kam, da kaba suk yn lah ban leh ïa kane,” u la ong.
Haba kdew ba ki briew kiba shong ha katei ka jaka ki tieng ïoh ba ka jingbthei ka dei kaba la leh khnang ban pynthut ïa ka suk ka saiñ, u Singh u la ong ba katei ka jingjia kam dei kaba long la ka jong, hynrei ka kdew ïa ka mat kaba khraw jong ka jingsngewpher jaidbynriew bad ka jingshngaiñ jong ki rit paid hapoh Meghalaya.
“Ngi pyntip sha phi ha ryngkat ka jingsngewkhia ba ym don mano-mano na ka Sorkar Jylla, naduh u Myntri Rangbah sharum kiba la pynrem ïa kaei kaba la jia haduh mynta. Ki nongïalam saiñ pyrthei kiba ju pynmih kyrwoh pyrshah ïa ki nongshong shnong ka Punjabi Colony, khlem da shim por, kim shym la ang shi kyntien ne wan jngoh ïa ka jaka ban pynpaw ka jingsngewkhia halor ka jingbthei ne jingkyrshan ïa ki nongshong shnong ha kane ka jaka,” la ong u Secretary ka HPC.
Kumta ka kynhun ka kyrpad ïa ka Sorkar India hapoh ka jingïalam u Shah ban leh eiei bad ai ka rai kaba mardor halor katei ka bynta naba ka long kaba donkam ym tang ban tohkit bniah ïa katei ka jingjia ba dang shen, hynrei ba kito kiba donkti ha ka jingbyrngem-jingbyrsit bad pynsaphriang ïa ka jingtieng hapdeng ki jaidbynriew bar jylla ba kin shim ka jingkitkhlieh.
“Ngi ngeit ba ka shong suk shong shngaiñ kan wan biang da kaba leh eiei mardor pyrshah ïa kito kiba buh jingeh ïa kiwei pat, ha jaka ban shah ïa kine ki mat ba khluit ban rieh shapoh,” u la ong.
Shuh shuh u Singh u la bynrap ba ki nongshong shnong ka Punjabi Colony kim kwah eiei hynrei ban im suk im saiñ, da kaba synñiang sha ka imlang-sahlang bad ka ïoh ka kot jong ka Jylla kumba ki la leh la bun pateng mynta.
“Ka jinglong-jingman ba mynta kaba dap da ka jingsheptieng bad jingbym shngaiñ, ka pynthut ym tang ïa ka bha ka miat jong ngi hynrei ka jingïatylli hapoh ka imlang-sahlang bad ka roi ka par jong ka Jylla,” u la ong.
Nalor kane, u la ong ba ka dei kamram ka Sorkar Pdeng ban pynneh-pynsah ïa ka aiñ bad ïada ïa ki hok bad jingshngaiñ jong baroh ki nongshong shnong jong ka, la ki long na kano-kano ka jaidbynriew.
“Ka jingshimkhia bad jingtuklar ba mardor jong phi haba ïadei bad kane ka bynta ym tang ba kan pyntikna ïa ka jingshngaiñ jong ki nongshong shnong ka Punjabi Colony, hynrei kan phah ruh ïa ka khubor kaba khlaiñ pyrshah ïa ka jingsngewpher jaidbynriew,” u la ong.
