Nongstoiñ, Lber:
Da ka jingsngewsih kthang, ka kmie jong u samla Mackbornbonny Kharbani uba la shah pynïap dusmon ha ki runar ha ka miet shiteng synñia ka 3 tarik u Lber 2024, ka la jaw ki ummat haba ai jingkren ha ka jingïalang ba lyngkot ha ka jingïalang thang mombati sngewlem bad pynrem ba la pynlong da ki nongñiah kali tourist Nongstoiñ kiba don hapoh ka shatri jong Joint Action Committee Nongstoiñ Tourist Associations ha jingkieng Nonbah ha Nongstoiñ ha ka janmiet ka 11 tarik u Lber 2024.
Ha katei ka jingthang mombati, da ka jingsngewkhia la ïohi da ki spah ngut ki paidbah ka sor Nongstoiñ ba kynthup naduh ki bahaïing bahasem, ki longkmie, ki samla, ki kynhun seng bapher bapher, ka Kur Kharbani, ki nongñiah kali bad kiwei kiwei ki la ïashim bynta ban pynpaw ïa ka jingsngewlem bad pynrem ïa ki runar kiba donkti ban pynïap ïa utei u samla.
Katei ka jingïalang thang mombati, lyngba ki nongkren na ki kynhun bapher bapher ka la pynpaw ïa ka jingdawa jur ïa ki bor jong ka aiñ ba ki dei ban leh eiei noh ban kem sa ïa kiwei kiba donkti lang.
Ka kmie u samla (L) Mackbornbonny Kharbani haba kren ha ka jingïalang, ka la pynpaw ïa ka jingsngewsih kthang ïa ka jingduh noh ïa la u khun.
Nalor nangta, ka la ïathuh ba u samla Mackbornbonny u dei u khun uba kyrshan ïa ka ïing ka sem naduh ba u kpa jong u um don shuh. U la long uwei na ki khun rangbah uba kyrshan ïa ka ïing ka sem hynrei ym shym la poi pyrkhat ba katei ka jingjia kan wan jia ba ki ‘riew runar bad ki ‘riew thrang snam kin shim noh ïa ka jingim ka jong u khun khlem kano-kano ka daw kaba shai.
Ka kmie jong utei u samla ka la ong ruh ba ngeit skhem ba U Blei un pynshai ïa kitei ki briew ba kin nym don kata ka jingsuk ka mynsiem ha ki, wat la ki don hangno-hangno hynrei ai ba kin phla hok noh.
“Nga ainguh ruh ïa U Blei ba lehse ka dei ka lynti ka jong u Mackbornbonny u ban kyrsiew thiah ïa ki kur ki jait ki bahaïing bahasem bad ki lok ki jor baroh ba ngin kynmaw ïa ka lynti ka jong U Blei ba ngin im ïa ka jingim kaba pynsngew bha ïa u, ba ngin ïoh ban ïeng ban rad dyngkhong ïa ki jingsniew jong kine ki runar bad kumjuh ruh kita ki ‘riew runar kin nym lah ban shu shong sngap jar bad buhrieh ïalade hynrei kin da pynpaw ba ki la leh ïa ka kam ba runar bad kin kylla kaba mut ym ba kin shu ïap ei ha ka pop,” la ong ka kmie.
“Kum ka jaidbynrew kaba im ha ka tipbriew tipblei, ka jaidbynrew kaba burom ïa ki para nongshong shnong, ngi don ka jingsngewkhia namar kat ban shim ïa ka jingim jong u para briew lehse kam long ka kam kaba suk,” la ong u Bah Apsharai Syiem, Secretary ka Hima Nongstoiñ haba kren ha ka jingïalang.
U Bah Apsharai u la ong, “Ngi ki briew ngim lah ban ai ka jingim ïa u para briew bad ngim don ruh ka hok ban shim ïa ka jingim jongno-jongno namar ngim lah ban ai pat.”
Kiwei pat ki nongkren ki la pynpaw ba ki bor jong aiñ ki dei ban shim khia ban pynshitom ïa kita ki nongleh kam sniew.
Shuh shuh ki don ki nongkren kiba la pynpaw da kaba ong, la ïohi ha ki lad pathai khubor ba yn ai buskit shi lak lada ki don kiba tip halor ka jingpynbthei bom. Balei kat ïa u nongpynïap briew ym lah ban leh eiei?
Ym tang katta, kiwei pat ki nongkren ki la dawa ba ka tnat pulit ka dei ban leh eiei noh ïa kiba dang donkti ha katei ka kam pynïap lym kumta kim banse ban kem hi.
