Shillong, Lber 12
Ka Laitjem CC bad ka Sohra Combine CC ki la ïoh jingjop ha kaba sdang ïa ka lympung ïalehkai 3rd District League T20 Cricket Tournament 2023 ba la pynlong da ka East Khasi Hills Cricket Association ha ka sngi Ba-ar ha madan Shortimai Syiem Stadium, Smit.
Ha kane ka jingïakhun ka Laitjem ka la pynliem noh ïa ka Mawphlang CC da 70 run. Ka Laitjem kaba la kam trai ban ried nyngkong, ka la kamai 147 run bad shah pynhap 9 wiket ha ki 20 over. U Nangkham Pathaw u la tied 42 run na ki 43 bol. Katba u Banbhalang Nongsiej u la shim 3 wiket na ka bynta ka Mawphlang.
Haba wan beh ïa ka thong, ka Mawphlang ka la ïoh tang 77 hadien ba shah pynhap baroh wiket ha ki 16 over. U Nativity Blah u la tied 14 run na ki 23 bol. Katba u Nangkham Pathaw u la shim 4 wiket na ka bynta ka Laitjem. Ïa ka nam Player of the Match la ïoh da u Nangkham Pathaw.
Haba phai pat sha kawei pat ka jingïakhun kaba ar, ka Sohra Combine ka la pynliem noh ïa ka Hurdles CC da 3 wiket. Ka Hurdles kaba la shimti ban tied nyngkong, ka la kamai 113 run bad shah pynhap 8 wiket ha ki 20 over. U Sandy Kharshandi u la tied 38 run na ki 35 bol. Katba u Donkyrmen Nadon u la shim 2 wiket na ka bynta ka Sohra.
Haba wan shimti ïa ka pali kaba ar, ka Sohra Combine ka la kynjoh sha ka thong da kaba ïoh114 run bad shah pynhap 7 wiket ha ki 19.1 over. U Mangkara Diengdoh u la tied 15 run na ki 10 bol. Katba u D. Shangpliang u la shim 3 wiket na ka bynta ka Hurdles. Ïa ka nam Player of the Match la ïoh da u Mangkara Diengdoh.
Ka jingïalehkai ha ka Sngi Balang kan long hapdeng ka Smit CC pyrshah ïa ka Thangsning CC ha ka por 8:30 mynstep, katba ka Lumpaia Avengers CC ïa ka Mawbisu CC ha ka por 12 baje mynsngi.
