Shillong, Lber 12
U MDC ka UDP na Sohra uba dei ruh u nongïalam ka Liang Pyrshah ha ïingdorbar jong ka Khasi Hills Autonomous District Council (KHADC), u la dawa na ka Executive Committee hapoh ka jingïalam jong ka NPP bad Congress ba kim dei ban ailad ïa ki jaidbynriew Garo kiba sah ha u pud u sam jong ka Council ban bat ïa ka kam synshar shnong namar kane kan buh jingma ïa ka jaidbynriew.
Kane ka jingpynpaw u Bah Titos ka dei ha ka dorbar kaba ar sngi haba ïatai kyllum ha ka mang tyngka ba la wanrah da u CEM ka KHADC ha ka sngi sdang dorbar.
U Bah Titos u la ong ba ki la don ki kynhun jaidbynriew Garo kiba la ïakynduh ïa u Myntri Rangbah ka jylla u Conrad Sangma ban tuklar ithuh ïa ki kum ki nongsynshar shnong ha khappud kaba hap ha Raid Marwet.
U la ong ki jaidbynriew Garo haba ki sah ha u pud Khasi Hills kum ha Shella, Mawsynram, Ranikor, Rambrai, Jirang, Mawshynrut ki la ïoh ïa ka hok ban thep ‘vote’, ki kam pynroi; hynrei ban knieh ïa ka kam synshar ym dei ban ailad.
Na ka liang u Deputy CEM ka KHADC, Bah Pynshngaiñ N Syiem, u la ong ba haduh mynta ka Council kam pat ai bor ïa kiwei ki jaidbynriew ne ki Garo ban long kum ki Rangbah Shnong.
