Shillong, Lber 12
U Executive Member ka Khasi Hills Autonomous District Council, Bah Teibor Pathaw, u la pyntip ba ki don haduh 174 tylli kiba dang sahteng ban ai jingbit ban shna ïing ha Shillong bad khapsor namar kim pat biang ki kot ki sla.
Haba jubab ïa ka jingkylli ba la wanrah da u Bah Titos Chyne kum nongïalam ka Liang Pyrshah ha kynta kylli jingkylli ha ka Dorbar Mang Tyngka kaba ar sngi, u Bah Teibor u la ïathuh ba ki don haduh 263 tylli ki jingai jingbit ban shna ïing (building permission).
U la ïathuh ba kito ki ïing kiba shna ha shwa u ‘nai Kyllalyngkot 2023 ki hap ban shim jingpynshisha na u Rangbah Shnong bad ki ophisar kin sa leit jurip shwa ban ai jingbit.
Nalor nangta, u la pyntip ba kine 174 tylli kiba sahteng ba khlem pat ai jingbit ka dei namar ka Building Authority jong ka Council ka dang phah pynbiang ïa ki kot ki sla katkum ka jingdonkam ha ka aiñ shna ïing.
Shuh shuh u la ïathuh ba ïa mynta ka Council ka dang pyntreikam ïa ki kyndon aiñ shna ïing tang ha Shillong bad mynta ka dang ïakren bad ka sorkar ban ai jingbit ban shna ïing shabar ka sor Shillong ruh.
Halor kane ka bynta, u Bah Teibor u la ïathuh ba ka tnad Pynroi Sor jong ka Sorkar Jylla ka thaw ïa ka committee bad ka la khot lang ïa baroh lai tylli ki council ban ïa pynbeit.
U la pyntip ba ka Council ka la thoh ruh sha ka MeECL bad PHE ba kim dei ban ai kano-kano ka jingmyntoi sha ki longïing lada ki khlem ïoh ïa ka syrnod jingbit na ka KHADC.
Haba ïadei bad kito ki ïing kiba la kham heh, ka Council ka don ïa ka expert committee ba kin bishar bniah.
