Shillong, Lber 12
Ki nongïalam jong ki kynhun niam bapher-bapher hapoh ka shatri jong ka Shillong All Faith Forum (SAFF) dang shen ki la ïakynduh ïa u Chief Secretary ka Jylla, u Donald Phillips Wahlang ban ïakren halor ki jingeh kiba ïakynduh da ki nongshong shnong ka Jylla kiba shong ba sah ha ki jaka khappud bad ka Assam.
Katkum ka jingïathuh u Vice-President ka SAFF, u Nababrata Bhattacharjee, ka kynhun ka la pynsngew ha u Chief Secretary halor ka jinglong-jingman wat hapdeng ka jingpynpaw ïa ka jingsngewkhia ba ka suk ka saiñ ka dei ban don ym tang hapoh ka Jylla hynrei wat ha ki khappud.
“Ka jingïadei bad ka suk ka saiñ hapdeng ki nongshong shnong jong ki 2 Jylla – dei ban pynneh-pynsah bad ba ki briew jong ngi kim dei ban shah ban beiñ ne shah pynshit,” la ong u Bhattacharjee hadien ka jingïalang Working Committee jong ka SAFF.
Na ka liang jong u, u la ïathuh ba u Chief Secretary (CS) u la pyntip sha ki dkhot ka SAFF ba u ïakren na ka por sha ka por bad u CS ka Assam jan man ka sngi ban peitngor ïa ka jinglong-jingman ha ki jaka khappud.
Ha kawei ka liang, u President ka SAFF, u Rev. Bishop Purely Lyngdoh u la ong ba ka Shillong ka la long bad ka dei ka jaka jong ka jingsuk.
U Rev. Lyngdoh u la ong ruh ba wat ki lad pathai khubor ki don ka jingkitkhlieh ban tei ïa ka suk ka saiñ hapoh ka Jylla.
“Dei tang lyngba ka jingsuk ba ngi lah ban ïa im lang, kiew bad ïa riewspah lang,” u la ong.
Namar kata, utei u nongïalam ka SAFF u la khot la wer ïa baroh ban sdang ïa ka kam jong ka jingsuk na Shillong bad ban rah sha kylleng ki Jylla bad ka thaiñ Shatei Lam Mihngi bad hadien kane, sha ka ri baroh kawei.
“Kane ka dei kaei kaba ka India ka donkam mynta, ka jingsuk bad da kaba leh kumne, ngi burom bad ai nam ïa la u Nongthaw,” la ong u Rev. Lyngdoh .
Shuh shuh u la bynrap ba ki jingjia ba dang shen ha Shillong bad Ri-Bhoi ki long tang ban pynkhluit ïa ki nongshong shnong ka Jylla bad ym dei ban ngop ha kiba kum kine ki jait kam.
