Shillong, Lber 12
U Virat Kohli un ym lah ban ïadon lang bad ka kynhun ïalehkai ka ri na ka bynta ka T20 World Cup kaba la thmu ban sdang ha u Jylliew mynta u snem ha West Indies bad ha USA.
Kat kum ki khubor kiba la mih, la ong ba ka BCCI ka la pynpaw ba kan ym long kaba biang na ka bynta u Kohli na ka bynta katei ka lympung, bad u Ajit Agarkar un ïaleh ban pynkohnguh ïa u Kohli na ka bynta ban ïadon bynta lang bad kane ka kynhun kaba la don tang kiba dangkham khynnah ha ka T20Is.
Te kumta u Virat Kohli u donkam ban ïalehkai bha ha ka IPL 2024 khnang ba u lah ban ïadon bynta lang hapoh ka kynhun. Kat kum ki khubor la ong ba ka kynhun ki nongjied kam pat shym la rai ban wanrah ïa u Kohli na ka bynta ka T20 World Cup namar ki sngewthuh ba kane ka lympung ïalehkai kan ym long kaba suk bad u donkam ïa ka por ba un wanphai biang kum u rangïalehkai ba kynsai.
Te kumta na ka liang ka Board of Control for Cricket in India (BCCI) ka la ïeh ha u Chief Selector u Ajit Agarkar na ka bynta ka lawei jong u Virat Kohli ha ka T20I.
Kumba ka paw u Kohli um shym la ïashim bynta ha kano kano ka jingïalehkai T20I naduh ba u la ïalehkai khatduh ha ka T20 World Cup 2022 bad ym pat lah ban pynthikna na ka bynta ka jingïalehkai T20I pyrshah ïa ka Afghanistan.
Lah ban sngewthuh ba u Agarkar u la ïakren bad u Kohli halor ka jingdonkam na ka bynta ka T20Is, ha kaba u Kohli u la pyrshang ban ïashim ha ka Afghanistan T20I. Na ka liang u Secretary ka BCCI u Jay Shah u la pynthikna ba u Rohit Sharma un shimti kum u kapten ïa ka kynhun na ka bynta ka T20 World Cup, hynrei um shym la pynpaw eiei halor u Kohli na ka bynta kane ka lympung. Na ka liang ka BCCI ka la pynpaw ba ki rangïalehkai kum u Suryakumar Yadav, Tilak Varma, Rinku Singh bad u Shivam Dube ki lah ban ialehkai bha ban ïa u Kohli ha ki jingïalehkai T20I.
