Ranchi, Lber:
Ka kynhun Enforcement Directorate (ED) ka la pynlong ïa ka jingleit khynra ha 17 tylli ki jaka kiba don ka jingïadei bad ka MLA jong ka seng Congress ka Amba Prasad, kynthup ha ka ïingsah jong ka kaba don ha Ranchi, ha kaba ïadei bad ka jingdon jong kiba bun ki jingjia jong ki kam bamsap kiba la mih na ki jingdie jingthied jaka-puta bad u shyiap.
Ka kynhun ED ka la sdang ban pynlong ïa kiba bun ki jingleit khynra ha ki jaka ba don jingïadei bad ka MLA Amba Prasad bad ki bahaïing jong ka ha Ranchi, Hazaribagh bad Ramgarh ha Jharkhand ha ka step jong ka Sngi Ba-ar.
Dang shen, ka Amba Prasad ka la ïakynduh ïa u MP barim jong ka Hazaribagh u Yashwant Sinha ha ka ïingsah jong u.
Ki la don ki khubor ba la saphriang ba ka Amba Prasad ka lah ban long ka kyrtong jong ka Lok Sabha na ka bynta ka seng Congress na Hazaribagh. Ka kynhun ED ka la pynlong ruh ïa ka jingleit khynra ha ki jaka jong u Circle Officer (CO) u Shashi Bhushan Singh, ïa uba dang shen u la shah thungkam ha Govindpur kaba don ha Dhanbad.
U Singh u la long u Circle Inspector ha Churchu kaba don ha Hazaribagh, hynrei hadien u la shah kyntiew noh sha u Circle Officer. U la trei ruh kum u CO ha Katamdag bad Hazaribagh Sadar jong ka Hazaribagh.
Ha ka samoi treikam jong u kum u CO ha Hazaribagh, u la shah mudui halor ka kam bamsap bad u la shah pynkynriah jaka noh sha Govindpur kaba don ha Dhanbad.
Ka jingleit thwet jong ka kynhun ED haduh ba la thoh ïa ka khubor ka dang ïai bteng ha ka jaka sah jong ka Amba Prasad kaba don ha Ranchi bad Barkagaon ha Hazaribagh, ha ka jaka sah jong u CO Shashi Bhushan Singh kaba don ha Hawaii Nagar ha Ranchi, ha ka jaka sah jong u nongbud jong ka seng BJP u Raju Sao ha Keredari kaba don ha Hazaribagh nalor ki jaka sah jong ki nongïarap baïajan jong ki MLA kiba dei jong u Bindu Dangi bad u Rajendra Sahu ha Hazaribagh.
Kumba la ïathuh ka tyllong khubor ba la wan na ka kynhun ED, la ong ba ki jingjia ha kaba ïadei bad ki jingmudui kiba long pyrshah ïa ka Amba Prasad bad ki mukotduma ba la buh ha kiba bun ki ïingbishar la pan da ka kynhun tohkit ha ki 10 bnai ba la leit lyngba ka shithi ba la thoh sha ki pulit jong ka Jharkhand.
Kine ki jingpyntreikam baroh ki la long hadien ka jingdon ka jingmudui kaba long pyrshah ïa ka MLA da ka kynhun ED kaba la kynnoh ïa ka ba ka la donkti ha ki kam bamsap kiba la mih na ka jaka bad u shyiap.
Kumba la pynshisha la ong ba ka kyrteng jong ka Amba Prasad bad ki dkhot jong ka longïing jong ka ki la paw ha kaba ïadei bad ka jingïaknieh jaka, ha kaba hadien kane ka la don ka jingpynpra ïa ka kynroh ba la ker sawdong u pud u sam jong ka jaka da ki bor pynïaid distrik.
Shuh shuh la ïathuh ba ka Amba Prasad bad ki dkhot ka longïing jong ka ki la shah kynnoh ruh ba ki la pyrshang ban klun sa ïa ka jaka jong ka sorkar da ka lynti kaba beaiñ ha Hazaribagh.
