Shillong, Lber 12
Ka jingïaid lynti ka kynhun ïakura jong ka ri ka la poi sha kaba kut ha ka World Boxing Olympic Qualification 2024 ha kaba u Nishant Dev u la mad ïa ka jingshah rem bad u la duh rung sha ka Paris Olympics 2024.
Utei u rangïakura uba la khur ïa ka takma rnong ha ka World Boxing Championships u la shah rem da 1-4 ha u Omari Jones ha ka quarter-final jong ka men’s light middleweight (71kg) category.
Ha kane ka lympung ïakura kaba la long ha Italy, u Nishant u la lah ban jam sha ka quarter final hadien ba u lah ban pynliem ïa u rangïakura uba na Italy u Busta Arsizio. Kham hashwa une u rangïakura ba dang 23 snem ka rta na Haryana u la lah ban pynliem ïa u rangiakura uba na Great Britain u Lewis Richardson, u Eskerkhan Madiev na Georgia bad ia u Christos Karaitis na Greece hashwa ba un jam sha ka quarter-final.
Hynrei ha kane ka jingïakhun quarter final u la shah rem noh ha u rangïakura na United States of America u Omari Jones, uba la khur ïa ka takma rupa ha ka World Championships kaba la long ha u snem 2021.
