Shillong, Lber 12
Ka Kynhun Myntri jong ka Sorkar Jylla ka la ai jingmynjur ïa ka mat treikam bathymmai haba ïadei bad ki karkhana kaba tip kum ka Meghalaya Industrial and Investment Policy, 2024. Ha kane ka kpait saiñ kam (policy) la don lypa ki kyndon ban aikam ïa ki trai shnong kumba 90 na ka 100 ha ka kyrdan ‘unskilled’.
Ïa kane la mynjur da ka Kynhun Myntri ha ka jingïalang kaba long ha ka Sngi Ba-ar.
Haba kren sha ki lad pathai khubor, u Myntri Rangbah u Conrad K Sangma u la ong ba kane ka kpait saiñ kam thymmai, kan plie lad ïa ka kam kaba palat `10,000 klur da ki riewshimet nalor ka kam kaba 90 na ka 100 ïa ki trai shnong ha ka kyrdan ‘unskilled.’
U Myntri Rangbah u la pyntip ba kane ka kpait saiñ kam bathymmai yn sa pyllait paidbah ha ka 14 tarik mynta u Lber. Hadien kane, yn sa pynbud da ka jingïasoi soskular Memorandum of Understanding (MoU).
U Conrad u la ong ba ka Industrial Policy bathymmai ka pynleit jingmut ha ki ar bynta, kawei ka long ban aikam aijam bad ban kyntiew ïa ki kam kum ka kam jngohkai, ka rep ka riang, ka rukom saiñ bam, ka pule puthi, Information Technology nalor ka jingpynshlur ïa ka jingthied ïa ki mar kiba pynmih na ka Jylla Meghalaya.
Haba phai sha ki kam kum ki karikor ban leh ïa ki optical fibre bad ki nongshet ba kyrpang ïa ki jait jingbam, u Myntri Rangbah u la ong ba lada ki trai shnong kim don ïa kane ka sap treikam, hap ailad kumba 2 snem tang 25% ban thungkam ïa ki trai shnong hynrei ha kine ki ar snem, ka jingdon kiba ïoh kam ka dei ban kiew la kumno-kumno sha ka 50%.
Haba batai ba kane ka kpait saiñ kam thymmai ka dei kawei na ki kpait saiñ kam ba biang eh, u Myntri Rangbah u la ong “Kane ka dei ban ïaid ha ryngkat ka thong jong ka Jylla ban kynjoh sha ka ïoh ka kot kaba 10 billion dollar”.
U Myntri Rangbah u la ong ba kum kane ka kpait saiñ kam la khmih lynti ba kan sa tam palat ïa ka shi billion dollar da `10,000 klur ka jingkynshew kaba la buh ha kine ki 3-4 snem ban wan.
