Shillong, Lber 12
U MLA ka BJP na South Shillong, Bah Sanbor Shullai haba pynshai ba ka aiñ Citizenship Amendment Act (CAA) kan nym treikam ha ki jaka ba hap hapoh ka Khyrnit Hynriew ba kynthup ïa ka Meghalaya, u la ong ba kane ka la long katkum ka dorkhas kaba u la phah ha ka 19 tarik Naiwieng, 2019.
“Nga dei u MLA ka BJP ba nyngkong eh na ka thaiñ Shatei Lam-Mihngi uba la rah ïa kane ka mat kaba ktah bad sngewkhia na ka bynta ka thaiñ Shatei Lam-Mihngi, ban pyllait ïa ki jaka jong ki riewlum na ka jingpyntreikam ïa ka CAA,” la ong u Bah Sanbor ha ka kyrwoh khubor.
U Bah Sanbor Shullai haba ai khublei ïa u Myntri Rangbahduh ka Ri u Narendra Modi, ba la pyllait ïa ki jaka hapoh ka Khyrnit Hynriew na ka jingpyntreikam ïa katei ka aiñ, u la ong, ba dei tang na ka jingrah shakhmat jong ki MLA ka BJP ïa kane ka mat, ba la shimkhia da ki nongïalam ka BJP na Delhi.
Shuh shuh u Bah Sanbor u la ong ba ïa ka Citizenship Act 1955 la dep ruh ban pynthymmai ne pynkylla ha ki por ba la leit da ka Sorkar Congress bad ha kaba ym shym la pyllait satia ïa ki jaka jong ki riewlum hapoh ka jingsynshar jong ka Congress, hynrei ka Sorkar BJP hapoh ka jingïalam jong u Narendra Modi ka la pyllait ïa ki jaka jong ki riewlum na katei ka aiñ.
