Shillong, Lber 12
Wat hadien ka jingïoh kem ïa arngut ki briew ba la suba donkti ha ka jingpynbthei ïa uwei u bom IED ha Them Ïew Mawlong, ki pulit ka East Khasi Hills haduh mynta ki khlem pat weng ïa ka jingtyrwa ban ai buskit T.1 lak ïa kino-kino kiba wan shakhmat ban ai jingtip halor kiba donkti ha kane ka jingpynbthei bom.
Lah ban kdew ba katei ka jingtyrwa ka la wan naduh ka janmiet jong ka Sngi U Blei. Hynrei ha ka miet jong ka Sngi U Blei pat, ki pulit ki la kem ïa arngut ki briew ba kynthup ïa u Tarson Lymba uba dei ruh u dkhot ka seng Hynñiewtrep National Youth Front (HNYF) na Dawki bad u Ebakordor Nongpluh na Shillong.
Haba kylli na u SP ka East Khasi Hills, u Rituraj Ravi, u la ong ba ki pulit kim pat weng satia ïa katei ka jingtyrwa buskit kaba T.1 lak wat hadien ba la ïoh kem ïa kitei ki arngut. U la ong ka daw ka long ba ki pulit ki kwah ban kem lut sa ïa kiwei pat kiba la donkti lang ha katei ka jingpynbthei bom.
Lah ban kdew ba ki pulit ki la ong ba kin ym pyntip paidbah ïa ka kyrteng jong kito kiba wan shakhmat ban ai jingtip bad kin ïoh ruh ïa katei ka buskit. Kino-kino kiba don jingtip halor katei ka jingjia ki lah ban phone ne phah khubor ha u nombor 9366790273 lane ha ka email [email protected].
Kum ban pynkynmaw ha ka miet Sngi Saitjaiñ ha ka por kumba 10:30, uwei u bom IED u la bthei ha kawei ka jaka ba la ker da ki tin bad ka bym don ba pyndonkam da mano-mano ha Syndicate Bus Stand ha Them Ïew Mawlong.
