Shillong, Lber 12
Ka All India Trinamool Congress (AITC) ha ka Sngi Ba-Ar ka la pynbna ban pynïakhun da u MLA barim, u Zenith M Sangma, ha ka ilekshon MP Lok Sabha na Tura Parliamentary Constituency.
Ha u kyrwoh khubor, ka AITC ka la ong, “Hapoh ka jingïalam bad jingai mynsiem ka Shongknor, Mamata Banerjee, ba u kyrtong ka AITC na Tura Parliamentary Constituency un dei u Zenith M Sangma. Ngi ai ka jingkitbok ïa u Zenith bad ngi kyrmen ba un poi sha ka thong.”
Lah ban kdew ba u Zenith un hap ban ïakhun pyrshah ïa ka MP ba mynta na ka NPP, ka Agatha K Sangma, bad u kyrtong ka Congress, u Saleng A Sangma, uba long ruh u MLA ba mynta ka Gambegre.
Ha ka jingshisha, ka Congress bad ka AITC ki ïatreilang ha ka kynhun “INDI” Alliance, hynrei kine ki seng ki la ïaid shakhmat ban pynbna ïa la ki jong ki kyrtong. Tangba ka AITC kan ym pynïakhun na ka Shillong Parliamentary Constituency katba ka Congress ka la rai ban pynïeng biang da u MP uba mynta, u Bah Vincent H Pala.
U Zenith u dei u MLA bad Myntri barim ka sorkar uba la mihkhmat ïa ka Rangsakona konstitwensi. U dei ruh u para trai jong u nongïalam ki MLA ka TMC ha Meghalaya bad Myntri Rangbah barim, u Dr Mukul M Sangma.
Kane kan dei ka sien ba-ar ba u Zenith un ïakhun ïa ka ilekshon MP na Tura Parliamentary Constituency. Ka sien banyngkong ka dei ha u snem 2008 pyrshah ïa ka Agatha hi hadien ba u MP ha kato ka por, u Purno Agitok Sangma, u la hiar shuki namar ka jingshah jied kum u MLA ka NCP na Tura.
