Nongpoh, Lber 12
Ki pulit ka jylla lyngba ka jingïatreilang hapdeng ki pulit ka East Khasi Hills bad ka Ri Bhoi District ki la lah ban pynpulom noh ïa ka jingthmu jong ka seng kieng atiar Hynñiewtrep National Liberation Council (HNLC) ban bteng pynbthei bom IED ha ki bynta jong ka sor Shillong bad Nongpoh.
Kum ban shu pyntip khyndiat, ki pulit ka East Khasi Hills District ki la ïoh ban kem ïa ar ngut ki briew kiba la suba donkti bad ka seng HNLC halor ka jingsuba donkti ban pynbthei ïa u bom IED ha ki bynta jong ka Them Ïew Mawlong ha ka miet 9 tarik u Lber.
Katkum ka kyrwoh khubor ba la pyllait da u Superintendent of Police (SP) ka Ri Bhoi District, u Jagpal Singh Dhanoa, la ïathuh ba ha ka janmiet jong ka 11 tarik u Lber ha ka por kumba 6 baje eiei, ki pulit ki la ïoh ban bat shwa ïa kawei ka kali Bolero Pickup kaba don ïa u nombor ML12-3243 ha ki bynta jong ka surok Umsning-Mawhati bad kem ruh ïa u nongñiah ba la tip kyrteng kum u Damanbha Ripnar bad ka kyrteng sin kum u Shall Lapang.
Hadien ka jingtohkit bad lyngba ka jingphla jong u Damanbha Ripnar, ka kynhun Bomb Disposal Squad jong ka East Khasi Hills ka la ïoh ban kurup ïa uwei u bom IED na katei ka kali bad ïoh ruh ban kem sa lai ngut kiwei kiba la tip kyrteng kum u Robinis Ripnar, u Jill Tariang lem bad u Shining Nongrum.
Ka kyrwoh ka ïathuh ruh ba baroh kine saw ngut kiba la shah kem ki dei kiba don bynta ban trei napoh-napoh bad ka seng HNLC bad kiba dang thmu ban pynbthei bom IED ha ki bynta jong ka sor Shillong bad kumjuh ha Nongpoh lyngba ka jingbthah ki nongïalam ka seng na Bangladesh.
Lyngba ka jingïoh kem ïa kitei saw ngut, ki pulit ki la ïoh ban kurup ïa bun ki tiar pynbthei ba kynthup 15 tylli u gelatin sticks, 167 tylli ki splinters, uwei u safety fuse wire, 3 tylli ki non-electric detonators bad san tylli ki mobile phone nalor katei ka kali kaba la pyndonkam da u Damanbha Ripnar.
Shuh shuh ka kyrwoh na u SP ka Ri Bhoi ka la pyntip ruh ba ïa kitei baroh saw ngut kiba la shah kem la pynrung da ka criminal case ha thanat Nongpoh katkum ki kyndon 120B/121A jong ka Indian Penal Code, kyndon 10/13/18 jong ka Unlawful Activities (Prevention) Act bad 5/6 jong ka Explosive Substances Act ha ka Case No. 25(3)2024.
Ha ka Sngi Ba-ar, ki pulit ki la ïalam tian-bishar ïa kitei saw ngut kiba la shah kem sha ka ïingbishar District & Session Judge ka Nongpoh na ka bynta ban pan jingbit ban pynlong shuh shuh ïa ka jingtohkit halor kane ka jingjia.
