Tura, Lber 12
Ka tnad Wildlife jong ka Jylla ka la kem noh ïa uwei u briew bad pynlong ka jingtohkit hadien ka jingïoh jingtip halor ka jingdonkti u briew/kynhun ban pynïap bad bam ïa uwei u skei (barking deer) ha South West Khasi Hills.
Wat la ym pat lah ban pyntikna ïa ka tarik jong ka jingjia, ki dur jong u briew uba na ka shnong New Harigaon, uba rah ïa u skei uba la ïap ka la saphriang sted hynnin ka sngi – ïa kaba ki ophisar ka tnad ki la ïoh jingtip hynnin ka sngi.
Hadien katei ka jingujor, ka jingtohkit halor kaei kaba la jia ka la ïaid shakhmat bad la lap ruh ïa u briew uba donkti ban pynïap ïa utei u skei. U la shah kem hadien ka jingtohkit na kaba sdang.
“Ngi la dep kem ïa uba donkti uba hakhmat eh. Kumba ka long, ka jingtohkit ka dang ïaid ban lap ïoh don shuh kiba donkti,” la ong u DFO ka tnad Wildlife, u Rupankar Marak.
