Shillong, Lber 12
Ki pulit ha ka Sngi Ba-Ar ki la pyntip ba ha ka 9 tarik Lber ha ka por kumba 4:10 baje mynstep, ki runar ki bym lah ban ithuh ki la leit thang ïa kawei ka ar shaka (ML-05Q-9590) kaba dei jong u Biswajeet Deb ha ka jaka ba u shong u sah ha Lumshyiap, Shillong. Hynrei ha kane ka jingjia, ym shym la don satia kiba mynsaw.
Ha kawei pat ka jingjia, u Marius Warjri u la ujor ba ha ka 9 tarik Lber ha ka por kumba 1:00 baje mynstep, ki runar ki la tuh noh ïa ka thuk-thuk jong u (ML-05Q-8331) kaba la pynïeng hajan ka ïing sah jong u ha Lumjingsuk-A, Madanrting, Shillong.
Nalorkata, ki pulit ki la ong ba ha ka 10 tarik Lber ha ka por kumba 8:30 mynmiet, ki runar ki la shoh la dat ïa u Cherister Kurbah, 27 snem ka rta, ha ka shnong Weilyngkut, Sohïong, bad ïa une uba la shah shoh la rah sha Mawphlang CHC ban ai jingsumar na ka daw ba u la mynsaw.
Shuh shuh ki pulit ki la pyntip ba kawei ka longkmie kaba na Nongbak A’ding, Mangsang (East Garo Hills) ka la ujor ba ha ka 8 tarik Lber ha ka por kumba 11 baje mynstep, uwei u briew ba la tip kyrteng kum u Etchuel Marak, uba la rah da ka wait, u la byrngem ban pynïap ïa ka lem bad ka khun.
