Shillong, Lber 12
Kan long ka jingïaid lynti kaba thymmai na ka bynta kawei ka kynhun ïalehkai ha nongbah, ka Nangkiew Irat Sports Club hadien ba la shimti noh da ka Edgy Sports Management Solutions LLP.
Kane ka la wan hadien ba ki trai jong kane ka klob ki la die noh sha ka Edgy Sports ha kaba la khmih lynti ba kane ka klob kan dang ïai kiew shaphang na ka bynta ban plie lad ïa ki nongïalehkai hapoh ka jylla bad wat shabar ru kumjuh.
“Hadien ba ngi bishar bniah bad ka jingïamir jingmut lang, ngi la shim ïa ka rai ban aiti noh ïa kane ka klob sha ka Edgy Sports Management Solutions LLP. Kumta ngi khmih lynti ba kin dang lah ban nang kyntiew shaphrang ïa ka Nangkiew Irat SC. Ngi khmih lynti ruh ba kane ka klob kan nangkynjoh kham shakhmat lyngba ka jingïoh ka jingkyrshan lang na ki paidbah,” la ong ka kyrwoh na ki trai klob barim.
Kumba ka paw ka Nangkiew Irat ka dei ka kynhun ka ban shim bynta ha ka Shillong Premier League ba la pynïaid da ka Shillong Sports Asscoation. Kane ka kynhun kan ïakhun nyngkong eh pyrshah ïa ka Sawmer SC ha ka 19 tarik mynta u bnai.
