Shillong, Lber 12
Kawei ka dur-khih kaba la saphriang shaphang uwei na ki rangïalehkai Mixed Martial Arts na Manipur u la kyrpad ïa u Myntri Rangbahduh ka ri u Narendra Modi ba un sngewbha ban wan jngoh shisien da la ki jong ki khmat ïa katei ka Jylla ka thaiñ shatei lammihngi naduh ba ka la mih ka jingkynad kaba la sdang ha u Jymmang mynshem snem.
Kane ka dur-khih kaba don tang 0.43-sekhon ka la saphriang kylleng naduh ka Lah Sngi U Blei, ha kaba u Chungreng Koren da ka mynsiem ka jingpait dohnud u la pynpaw hadien ba u la khur ïa ka jingjop ha ka MFN Bantamweight Championship ha Noida myn ha ka 9 tarik mynta u bnai.
Kumba ka paw u Modi um pat shym la leit jngoh ïa ka jylla Manipur naduh ba ka la mih ka jingïakynad ha ka 3 tarik u Jymmang 2023, kaba la pynlong kumba 221 ngut ki briew ban duh ei la ka jingim bad kumba 67,000 ki la kylla phetwir.
Kat kum ka jingpynpaw u Koren da ka mynsiem ka jingsngewkhia ha katei ka dur-khih, u la ong, “Nga kwah ban pynpaw kawei, da ka mynsiem ka jingsngewkhia nga kyrpad jur ïa u Modiji. Kane ka jingïakynad ha Manipur, ka la neh la jan shi snem. Man la ka sngi ki briew ki la duh ei la ka jingim. Ki briew kiba la shong ha ki ‘relief camp’ kim shym la ïoh wat tang ka bam ka um bad ki khynnah kim ïoh shuh ban leit skul thikna.”
“Ngi sngewkhuslai shaphang ka lawei jong ki nongshong shnong ha Manipur. Modiji, sngewbha wan ban jngoh shisien ïa ka jylla Manipur. Ka Manipur ka kwah ïa ka jingshong suk shongsaiñ sa shisien pat,” u la bynrap.
Wat la u Koren uba dang 26 snem ka rta um shym la ïoh ban iakren bad la kiba haïing kiba ha Kamu Koireng kaba ha Kangpokpi kaba ha Imphal East district. Ka kmie, ka kurim, ki ar ngut ki khun bad kawei ka khun kynthei ki shong ha katei ka shnong.
