Shillong, Lber 12
U Myntri Rangbah ka jylla, u Conrad K Sangma, ha ka Sngi Ba-ar u la buh bad plie ïa ki mawnongrim ban pyntreikam ïa saw tylli ki projek ha nongbah Shillong, ba kynthup ïa ka jingpynitynnad bad jingpynkylluid ïa ka nongbah Shillong.
Kitei saw tylli ki projek kiba la dep ban buh bad plie mawnongrim da u Myntri Rangbah ha ka jingïalang kaba la long ha Nan Polok, ki kynthup ka jingtei ïa ka Commercial Building ha Polo, Mechanised Multi-Level Car Parking ha Vivekananda Road hajan ka Additional Secretariat bad ka Polo Commercial Complex, nalor ka projek pynitynnad ïa ka Ïewduh bad ka jingpynbhabriew ïa 5 tylli ki pung ha ka jylla bad ïa ka Ward’s Lake Promenade.
Haba kren ha ka jingïalang, u Myntri Rangbah u la ong, ka sorkar ka don ïa ka jingangnud ban pynkylla ïa ka nongbah Shillong sha ka nongbah kaba katkum kane ka juk ba mynta bad ban ai ïa kaba donkam kaba kadei ban ïoh ha ryngkat bad ka jingïaleh ban pynkylluid ïa ka.
Ha kaba ïadei bad ka jingpynitynnad ïa ka Ïewduh, u Conrad u la ong, “Kane kadei kaei-kaei kaba ki la ïa pyrkhat bha bad ki la trei khnang ba ka ïew kan itynnad bad ban pynbha ïa ki jingdonkam khnang ba kan plie lad ban khring ïa ki nongjngohkai bad ïa ki nongshong shnong ki jong ngi kiba leit ha katei ka ïew”.
U Myntri Rangbah u la pyntip ba ka T. 15 klur na ka bynta ka projek ha Ïewduh ka long ban pynbha bad pynkylla dur ïa katei ka ïew tynrai kaba la rim bha. Kane ka projek ka kynthup ïa ka jingpynïaid ryntih ïa ki pipe um, ban shna ïa ki nala, ban shna ïa ki paiñkhana, ban pynbiang ki kali lum ñiut bad ki tin bret ñiut, ka jingbuh ïa ki bording bad ban pynitynnad ïa ki building khnang ba kan ai jingmyntoi ïa ki nongdie, nongthied bad ki nongjngohkai.
Ha kaba ïadei bad ka jingpynbhabriew ïa ka Nan Polok (Ward’s Lake) bad ïa ka Ward’s Lake Promenade, u Conrad u la ong kum shi bynta jong ka projek, ka bynta kaba 1.5-2 Km mar pyrshah ïa ka Nan Polok yn pynbha ïa ki dukan, ka jaka die madan, jaka ïeng kali bad ki basa bam ban kyntiew ïa ka jingdie ki trai jylla bad ban long kum ka jaka kaba ki paidbah kin ïoh ban ïakynduh bad ban ïakren ïakhana.
U la ong ba kiwei pat ki lynti kiba thmu ban pynitynnad ïa ka Nan Polok ki kynthup ban pynkhuid ïa katei ka pung, Laser Show, Amphitheatre, Water Fountain bad kiwei kiwei.
“Ka Nan Polok ka don ïa ka kabu kaba paka bha ym tang na ka bynta ki nongjngohkai hynrei wat ïa ki nongshong shnong hapoh ka jylla hynrei ngim shym la khmih bniah bha ïa kitei kiei-kiei kiba ngi lah ban leh,” la ong u Conrad.
U la ong ba ka sorkar ka phaikhmat bha ïa ka mat jong ka jingkhapngiah bad ka jingdheng kali ha ka nongbah Shillong.
“Wat la ngi la don ïa ka saiñdur bakhraw ban pynkylluid ïa ka nongbah Shillong da kaba pynkynriah ïa ki shlem treikam sha ka New Administrative City bad Knowledge City, ngi dang trei man la ka sngi ha ki kam ki barit kiban wanrah ïa ka jingkylla bad ïa u mawnongrim uba ngi la buh mynta na ka bynta ka Mechanised Multi-Level Car Parking kadei ka lynti ka ban poi sha katei ka jingangnud,” u la ong.
U la pyntip ruh ka jinglut jingsep jong katei ka projek kan long kumba `90 klur ha kaba yn don kumba 465 tylli ki jaka ïeng kali.
Nalor kane, u Myntri Rangbah u la pynbna ba ki 5 tylli ki pung ha ka jylla kiba kynthup ïa ka Ward’s Lake, Malse Lake, Nirman Jheel, Memo Lake ha Williamnagar bad ka Rangjokram Lake ha Resubelpara kin sa shah pynitynnad noh bad shah pynkhuid.
Kane ka projek kan kynthup ïa ka jingpynkhuid, ka jingshna ïa ki katto katne ki jingdonkam bad ban ker ïa kitei ki pung.
U Myntri Rangbah u la pynbna ruh ïa ki projek kiba ka sorkar kala pynïaid shakhmat bad ïa ki projek kiba ka don jingthmu ban pyntreikam ban weng ïa ka jingkhapngiah, ban kyntiew bad pynkylluid bad pynbhabriew ïa ka nongbah Shillong.
