Shillong, Lber:
U Working President jong ka Khun Hynñiewtrep National Awakening Movement (KHNAM), u Bah Thomas Passah u la ong ba u Myntri Rangbah ka jylla um donbor satia ban aiti sanad long Rangbah Shnong sha uno-uno uba kwah long Rangbah Shnong.
Ïa kane u Bah Thomas u la pynpaw hadien ka jingmih ha ki lad pathai khubor ba ka All Ri-Bhoi Garo Headmen Association ka la leit ban ïakynduh ïa u Myntri Rangbah ka jylla, u Conrad K. Sangma ban dawa na u ba ki jaitbynriew Garo ruh ki don ïa ka hok ban ïoh sanad ban long Rangbah Shnong ha ki thaiñ Ri-Bhoi ha ki jaka ba shong ba sah lang ki jaitbynriew Garo.
Wat la ki don ki nongshong shnong Garo ha ki bynta jong ka Ri-Bhoi khamtam ha ki khappud bad ka jylla Assam, hynrei katei ka jaka ka hap hapoh ka jingpeit jingkhmih jong ka Khasi Hills Autonomous District Council (KHADC). Kane ka jingdawa jong ki jaitbynriew Garo ka la pynlong ruh ïa kawei ka kynhun sengbhalang ban pyrshah ïa kane ka jingdawa ban ai sanad long Rangbah Shnong sha ki jaitbynriew Garo.
“Ka long kaba donkam ban kdew hangne ba u Myntri Rangbah um donbor ban ai sanad long Rangbah Shnong ïa uno-uno, namar kane ka dei ka jingkitkhlieh jong ka Hima Mylliem bad ka KHADC”, la ong u Bah Passah.
Ka KHNAM ka la ong ba katkum ka aiñ jong ka KHADC kaba la tip kum ka Appointment and Succession of Syiem, Deputy Syiem, Electors and Rangbah Shnong of Mylliem Syiemship Act 2007, ka la kdew shai ba ki Rangbah Shnong ki dei ban long tang napoh ka Jaitbynriew Khasi bad ki bor kiba dei khmih ki dei ban pyntreikam katkum ka kyndon aiñ kaba don bad ba dei ban weng sharud ïa kino-kino ki jingdawa kiba long pyrshah ïa katei ka kyndon aiñ.
