Jowai, Lber 12
Ka Khasi Students’ Union (KSU) War Jaiñtia Circle bad ki shnong kiba kynthup ïa ka Bakur, Dawki, Hawai Bhoi Amsia, Sankhat, Muktapur bad Riahja-long ki la dawa na u District Magistrate jong ka West Jaiñtia Hills District ban weng ïa ka kyndon aiñ 144 CrPC kaba la pynjari ha khappud India-Bangladesh kaba la treikam naduh 9 tarik Rymphang ban tehlakam ïa ki kam sniew ha khappud bad ka jingrung tuh ki briew shapoh u pud sam ka ri India.
Ka KSU War Jaiñtia Circle ha ka jingïalam u Lop Steveson Khonglah kum President bad ki nongïalam shnong ha ka 12 tarik ki la ïakynduh bad ai da ka shithi ha u District Magistrate ban kyntu weng noh ïa ka kyndon aiñ 144 CrPC namar ka pynthut ïa ka ïaid ka ïeng u paidbah ha katei ka thaiñ khappud.
Haba ïakren bad ki lad pathai khubor hadien ka jingïakynduh ïa u DM, u President ka KSU War Jaiñtia Circle u Lop Stevenson Khonglah u la ong, ïa kane ka byrta la pyntreikam khlem ka jingïamir jingmut ne ai- ktien sha ki Dorbar Shnong kiba don ha ka thaiñ khappud kynthup naduh Dawki shaduh Jaliakhola.
U la ïathuh ba na ka liang u DM u la kular ban shim khia ïa kane ka bynta.
U Bah Kmen Myrshiang uwei na ki ‘riew rangbah ka thaiñ u la ong, kumba la tip na ka por sha ka por ki shipai BSF ki pynthut ïa ki nongshong shnong ha ka leit ka wan ka trei ka ktah khamtam ka leit rep leit riang bad ka jingpyntreikam ïa kane ka byrta ka long kum ka jingai bor shuh shuh ïa ki shipai BSF ban thombor ïa ki paidbah nongshong shnong ka thaiñ khappud.
Dei halor katei ka nongrim, u la ong ba ka KSU War Jaiñtia Circle bad ki Waheh Shnong ka thaiñ ki la dawa na u DM ban weng noh ïa kane ka kyndon aiñ bad ym dei ban pynjlan hadien ba kut jong ka ar bnai.
