Chennai, Lber:
U TTV Dhinakaran jong ka seng Amma Makkal Munnetra Kazhagam (AMMK), uba la shahbeh noh na ka seng All India Anna Dravida Munnetra Kazhagam (AIADMK) ha u snem 2017 ha ryngkat ka ñiakha jong u ka VK Sasikala kaba dei ka nongïarap ba ïajan bad ka heh nongïalam barim jong ka seng ka J Jayalalithaa, un sa ïakhun ïa ka ilekshon 2024 ka ban sa wan ha ryngkat ka jingïatreilang bad ka seng Bharatiya Janata Party (BJP) ha Tamil Nadu.
“Ngi la pynskhem ïa ka jingïatreilang bad ka seng BJP,” la pynbna u Dhinakaran ha ka Lah Sngi U Blei.
U la bynrap shuh shuh da kaba ong ba ka seng AMMK ka la tyrwa ba kan ai ka jingkyrshan kaba khlem sangeh sha ka seng BJP ban pyntikna ba ka Tamil Nadu ka la leh ei ei na ka bynta ban jied biang ïa u Narendra Modi kum u Myntri Rangbahduh ha ka sien kaba lai jong ka samoi treikam jong u.
U la ong ba u la ïakren bad ka seng BJP na ka bynta ki 6 bnai bad kam shym la dawa shuh ïa ki konstitwensi na kaei ba la dep ban mang.
“Nga la shu ong ba lada ka seng BJP ka ïai bteng ban wanrah ïa ki skhim kiba long pyrshah ïa ki briew jong ka Tamil Nadu, kata nga lah ban pynkut noh ïa ka jingïatreilang bad ka,” u la ong shuh shuh.
